طريقة عمل البطاطس بجميع انواعها
بطاطس فارم فريتس 
طريقة التحضير:
كيلو بطاطس مقطعة صوابع
زيت
– نقطع البطاطس صوابع ونغسلها وننشفها من الماء كويس بين فوطة نظيفة او مناديل مطبخ.
– في زيت غزير سخن نقلي البطاطس على دفعات نصف قلية فقط.
– نخرج البطاطس في صينية كبيرة في طبقة واحدة يعني كل واحدة جنب التانية ولما تبرد حطيها في الفريز ساعة على الأقل وبعدين اقليها في الزيت وخرجيها على مناديل ورق تتصفى من الزيت ورشي عليها الملح واي توابل تحبيها.
بطاطس باللحمة المفرومة 
المقادير:
نصف كيلو لحمة مفرومة
بصلة مفرومة
2 فص ثوم مهروس
2 جزر مفروم
2 عود كرفس مفروم
كوب الا ربع بازلاء مجمدة
2 معلقة كبيرة معجون طماطم
2 كوب مرق لحمة او خضار (480 مل)
معلقة صغيرة زعتر ناشف
رشة خل
كيلو بطاطس مقشرة ومقطعة شرائح رفيعة
رذاذ زيت الطهي
طريقة التحضير:
– شوحي اللحمة المفرومة مع الكرفس والبصل والثوم والزعتر والجزر.
– ضيفي مرقة اللحم او الخضار وصلصة الطماطم والخل وخلي المزيج يغلي.
– خففي النار وغطيها وسيبيها على نار هادية لمدة 10 دقايق بس.
– تبلي بالملح والفلفل الأسود حسب الحاجة.
– سخ
ني الفرن مسبقًا على 200 180 درجة مئوية.
– حطي خليط اللحمة في طبق بايركس، وضيفي البازلاء المجمدة واخلطيهم مع بعض ورصي شرائح البطاطس فوقها.
– رشي شوية زيت بالبخاخ فوق البطاطس ودخليها الفرن لمدة 45 دقيقة تقريبًا لحد ما البطاطس تستوي وتاخد لون ذهبي من فوق.
-رشي البقدونس المفروم ورشي القليل من الملح والفلفل الأسود على الوش وقدميها.
بطاطس بالمشروم
المقادير:
كيلو بطاطس مقشرة ومقطعة مكعبات
كوب الا ربع دقيق
ملح وفلفل حسب الرغبة
لحشوة المشروم:
ربع كيلو مشروم مقطع ناعم
بصلة متوسطة مفرومة ناعم
2 فص ثوم مفروم ناعم
معلقة كبيرة شبت مفروم فرم خشناً
معلقة كبيرة زيت
2 معلقة كبيرة عصير ليمون
ملح وفلفل حسب الرغبة
رشة شطة
طريقة التحضير:
– نضيف البطاطس المقطعة في طاسة كبيرة ونغطيها بالماء.
– نسيبها تغلي ونخفف النار ونسيبها على نار خفيفة لحد ما تستوي حوالي 20-30 دقيقة.
– صفيها واهرسيها وتبليها بالملح والفلفل وخليها تبرد أثناء عمل الحشوة:
سخني معلقة كبيرة زيت في طاسة وشوحي البصل لمدة 5 دقائق.
– ضيفي الثوم والمشروم وعصير الليمون والشطة وتبلي بالملح والفلفل حسب الرغبة.
– سويه لمدة ربع تقريبًا أو لحد ما المشروم يبقى طري ومعظم السائل يتبخر ارفعيه عن النار وضيفي الشبت المفروم.
– اخلطي الدقيق مع البطاطس المهروسة وابدأي في التشكيل: خدي كام معلقة كبيرة من العجين وافرديهم شرائح مسطحة.
– ضيفي حوالي معلقة كبيرة من مزيج المشروم في المنتصف، وحطي المزيد من مزيج البطاطس وشكليها على شكل قرص صغير.
– ضيفي شوية زيت في طاسة على نار عالية وبمجرد ما يسخن الزيت ضيفي اقراص البطاطس وسويها على كل وش لمدة دقيقتين او لحد ما تاخد لون ذهبي.
اومليت البطاطس الأسباني 
طريقة التحضير:
نصف كوب زيت زيتون
5 حبات بطاطس مقطعة مكعبات صغيرة
بصلة بنية كبيرة مفرومة
8 بيضات
ملح وفلفل اسود حسب الرغبة
فلفل أسود مشقوق حسب الرغبة
بقدونس للتزيين (اختياري)
طريقة التحضير:
– سخني شوية في طاسة تيفال وضيفي البطاطس وقلبيها لحد ما تستوي وبعدين ضيفي البصل وقلبي لحد ما يدبل.
– صفي الزيت بالكامل ورجعي البطاطس والبصل في الطاسة ورتبيها في طبقة واحدة وخففي النار.
– اخفقي البيض مع الملح والفلفل حسب الرغبة. وصبي مزيج البيض في الطاسة مع تحريك البطاطس والبصل حول البيض من وقت للتاني باستخدام ملعقة خشبية،
– لما يستوي حطي مستدير كبير فوق الطاسة واقلبي الاومليت على الطبق بايدك اللي ماسكة الطبق واقلبيه في الطاسة على الوش التاني.
– استمري في الطهي ورجي الطاسة من وقت للتاني لحد ما يستوي خالص.
حطي طبق تقديم فوق الطاسة واقلبي الاومليت فيها وقطعيه مثلثات وزينيه بالبقدونس وقدميه.
كرات البطاطس باللحمة المفرومة
المقادير:
4 حبات بطاطس مسلوقه ومهروسه
معلقة صغيرة ملح
نصف معلقة صغيرة فلفل اسود
2 معلقة صغيرة زبده
3 معالق كبار جبنة موتزاريلا
مقادير الحشوة
500 جرام لحمة مفرومة
بصلة مفرومة
نصف معلقة صغيرة ملح
ربع ملعقه صغيره فلفل اسود
معلقة كبيرة زيت زيتون
للتغليف
بيضتين مخفوقين مع ملح وفلفل أسود
كوب دقيق
كوب بقسماط
طريقه التحضير:
– في طاسه على نار متوسطة نضيف اللحمه المفرومه ونقلب لحد ما لونها بني نضيف البصل والملح والزيت ونقلب لمدة ربع ساعة
لحد ما اللحمه والبصل يستوي.
– نتبل بالفلفل الاسود ونرفع الطاسه عن النار ونسيبها علي جنب
نهرس البطاطس المسلوقة مع الملح والزبده كويس ونضيف الجبنه الموتزاريلا ونخلط لحد ما المكونات تتجانس.
– ناخد كمية بسيطة من البطاطس نعمل فيها تجويف ونحشيها بمعلقة لحمة مفرومة ونكورها ونقفلها كويس ونكرر الخطوة لحد ما الكمية تخلص
نغمس كرات البطاطس في الدقيق ثم البيض ثم البقسماط ونرصها في صينيه علي ورق زبده.
– نقليها في زيت غزير حامي لحد ما تتحمر ولونها يبقي دهبي
فطائر البطاطس
المقادير:
3 حبة بطاطس مسلوقه
بصلة مفرومة
بيضتين
ربع كوب دقيق
كوب حليب
معلقة كبيرة زبدة
رشة ملح
رشة كمون
رشة فلفل اسود
زيت للتسويه
الخطوات
– نسلق البطاطس بالطريقه التقليديه ونسيبها تبرد ونقشرها ونحطها في طبق ونهرسها باستخدام شوكة لحد ما تبقي ناعمه
– نضيف البصل المفروم للبطاطس ونقلب كويس لحد ما البصل يتجانس مع البطاطس
– نضيف البيض والحليب والدقيق والزبدة ونقلب ونخلط كل المكونات مع بعضها كويس وننزل برشة الملح والفلفل الاسود والكمون ونستمر في التقليب.
– نحضر طاسه وندهنها زيت بسيط ونسيبها علي النار تسخن وناخد معلقتين من الخليط ونشكله بأيدينا على شكل قرص صغير ونحطه في الطاسه لحد ما يستوي اول وش ياخد اللون الذهبي ونقلب علي الوش التاني.
طاسة الدجاج و البطاطس بالزبدة والثوم 
المقادير:
كيلو صدور دجاج مقطع شرائح طويلة
كيلو بطاطس مقطعة جوانح
كوب الا ربع صويا صوص
3 معلقة كبيرة زيت
صوص حار حسب الرغبة
3 ملعقة كبيرة زبدة مملحة
5 ملاعق صغيرة من الثوم المهروس
1.5 ملعقة صغيرة أوريجانو
1.5 ملعقة صغيرة روزماري
1.5 ملعقة صغيرة زعتر
معلقة شطة شطة
ملح
فلفل مشقوق طازج
طريقة التحضير:
– في طبق كبير اخلطي شرائح الدجاج مع الصويا صوص والزيت والفلفل والصوص الحار حسب الرغبة. وسيبيها على جنب.
– اسلقي البطاطس في ماء مغلي مملح لمدة 8 دقايق.
في طاسة على نار متوسطة اخلطي الزيت والزبدة.
ولما تدوب الزبدة ضيفي البطاطس وسيبيها لمدة 4 دقايق تقريبًا وبعدين قلبيها وسيبييها لمدة 4-5 دقايق كمان لحد ما تبقى ذهبية اللون وتستوي وبعدين انقليها في طبق وسيبيها على جنب.
– في نفس الطاسة على نار متوسطة ضيفي زبدة وشوحي الثوم وبعدين ضيفي التوابل وبعدين نزلي شرائح الدجاج في طبقة واحدة. وسويها على كل جنب لمدة 2-3 دقايق لحد ما تاخد لون بني وبعدين ضيفي البطاطس وسخنيها وصبي التتبيلة فوقها وقلبيها مع الدجاج وارفعيها عن النار وقدميها.
بطاطس جراتان
المقادير:
6 حبات بطاطس متوسطة الحجم
6 معلقة كبيرة زبدة
6 معلقة كبيرة دقيق
2 كوب حليب
كوب كريمة طهي
معلقة صغيرة ملح
2 فص ثوم مفروم
ملعقة ونصف صغيرة بصل بودر
ملح وفلفل أسود حسب الرغبة
3 كوب جبنة شيدر مبشورة
طريقة التحضير:
– قشري البطاطس وقطعيها شرائح رفيعة جدًا.
– على نار متوسطة دوبي الزبدة وضيفي الدقيق حتى وقلبي كويس وخليها لمدة 1-2 دقيقة مع التقليب المستمر.
– ضيفي الحليب والكريمة والثوم المفروم والبصل البودر وتبلي بالملح والفلفل وقلبي وسيبي الخليط على نار خفيفة لحد ما تحصلي على قوام متماسك.
– خففي النار وضيفي كوبين من الجبنة المبشورة وقلبي لحد ما تدوب.
– رصي نصف كمية البطاطس المقطعة في طبق بايركس مدهون بقليل من الزبدة. وصبي نصف كمية الصوص فوق البطاطس.
– حطي طبقة من البطاطس فوق. وصبي صوص الجبنة فوقها وبعدين ورشي جبنة مبشورة على الوش.
– غطيها بورق فويل دخليها الفرن على درجة حرارة لمدة نصف ساعة وبعدين شيلي ورق الفويل ودخليها الفرن تاني لحد ما البطاطس تستوي خالص والجبنة تاخد لون ذهبي والصوص يعمل فقاعات.
بطاطس كريمي بالجبنة الموتزاريلا 
المقادير:
1.3 كيلو جرام بطاطس مقطعة شرائح رقيقة
2 كوب كريمة طهي
3 فص ثوم مفروم
3 معلقة كبيرة زبدة
1.5 معلقة صغيرة ملح
ربع معلقة صغيرة فلفل
معلقة كبيرة أوراق زعتر طازجة
2.5 كوب جبن موزاريلا
طريقة التحضير:
– اسلقي البطاطس المقطعة لمدة 10 دقايق.
– اخلطي الكريمة مع الثوم المفروم والزبدة، ودخليهم الميكروويف لمدة 1-2 دقيقة لحد ما الزبدة تدوب.
– سخني الفرن على درجة حرارة 180.
– رتبي طبقة البطاطس الأولى في صينية وصبي أكتر من ثلث خليط الكريمة، وتبليه بالملح والفلفل وثلث معلقة كبيرة من أوراق الزعتر ورشي ثلث كوب جبنة موزاريلا وكرري الخطوة مع طبقتين كمان باستثناء عدم اضافة الجبنة على الوش.
– غطيها بورق فويل ودخليها الفرن لمدة 30-40 دقيقة أو لحد ما البطاطس تستوي.
– شيلي الفويل ورشي باقي الجبنة وسيبيها على نار عالية لحد ما الجبنة تسيح وقدميها مع اللحم او الدجاج المشوي.
بطاطس يونانية بالليمون 
المقادير:
1.2 كيلو بطاطس
1.5 كوب مرقة دجاج
نصف كوب زيت زيتون
ثلث كوب عصير ليمون
5 فصوص ثوم مفرومة
معلقة كبيرة زعتر ناشف
2 ملعقة صغيرة ملح
ليمون وأوراق الزعتر للتزيين
طريقة التحضير:
– سخني الفرن على 200 درجة.
– قشري البطاطس وقطعيها جوانح وحطيها في صينية جميع المكونات التانية.
– دخليها الفرن لمدة 20 دقيقة وبعدين قلبيها ودخليها تاني لمدة 25 : 30 دقيقة كمان لحد ما تستوي.
– انقلي البطاطس في طبق التقديم وزينيها بقطع الليمون والزعتر حسب الرغبة وقدميها.
قوارب البطاطس بالبيض
المقادير:
8 – 10 بطاطس كبيرة
رشة ثوم بودرة
1 فلفل احمر مقطع مكعبات
ربع كوب بصل أخضر مفروم
نصف معلقة صغيرة ملح
قطع سوسيس أو سلامي أو لانشون
8 بيضات كبيرة
طريقة التحضير:
– سخني الفرن مسبقًا إلى 190 درجة وبطني صينية بورق الزبدة. اغسلي البطاطس وخرميها بالشوكة او السكينة كذا مرة. ادهنيها بقليل من زيت الزيتون وحطيها في الصينية ودخليها الفرن لحد ما تبقى طرية حوالي 50 : 60 دقيقة.
– طلعيها وسيبيها لمدة 10-15 دقيقة لحد ما تبرد وتعرفي تعاملي معاها.
قطعيها نصين بالطول بحيث تكون شكل قوارب.
– فرغي البطاطس من الداخل بالملعقة وحافظي على القشرة الخارجية بشوية من قلب البطاطس ونحط اللي نفرغه في طاسة.
اثناء خبز البطاطس اعملي الحشوة:
– في طاسة كبيرة على نار متوسطة حطي شوية زيت شوحي الفلفل والبصل الأخضر وضيفي الملح وسويهم حوالي 5-7 دقايق.
– ضيفي قطع سوسيس او سلامي او لانشون وسويهم 5 دقايق كمان.
– اكسري البيض في طبق كبير واخلطيه وضيفي عليه مزيج الفلفل والسوسيس.
– قسميها بالتساوي بين كل البطاطس ودخليها الفرن لمدة 40 دقيقة أو لحد ما البيض يستوي.
بطاطس محمرة في الفرن
المقادير:
كيلو بطاطس
رشة ملح
رذاذ زيت الطهي
طريقة التحضير:
– قطعي البطاطس وحطيها في حلة على النار فيها ماء وبمجرد ما الماء يبدأ في الغليان اطفي النار وخليها لمدة 3 دقائق.
– صفيها واشطفيها بماء بارد ونشفيها بين فوطة نظيفة أو مناديل ورقة.
سخني الفرن على درجة حرارة 220 درجة.
– بطني صينية كبيرة بورق زبدة ورشي عليها رشة رذاذ زيت طهي.
– رصي البطاطس في الصينية طبقة واحدة، ضيفي رشة ملح بالتساوي على الوجه ورشي فوقها رذاذ زيت طهي.
– دخليها الفرن لمدة 40-45 مع التقليب من وقت للتاني بعد نصف المدة لحد ما تبقى ذهبية اللون ومقرمشة مع التقليب.
طلعيها ورشي عليها رشة ملح كمان حسب الحاجة.
بطاطس بمكعبات اللحمة 
المقادير:
نصف كيلو لحم مقطع مكعبات
بطاطس مقطعة مكعبات
نصف ملعقة صغيرة ملح (مقسم)
فلفل اسود
رشة زعتر
1.5 معلقة كبيرة زبدة
نصف معلقة كبيرة ثوم مفروم
1.5 معلقة كبيرة صويا صوص
زيت الطهي
بقدونس مفروم (للتزيين)
طريقة التحضير:
– اخلطي مكعبات اللحم مع ربع معلقة صغيرة من الملح والفلفل الأسود.
قشري البطاطس وقطعيها مكعبات.
– في طاسة على نار متوسطة ضيفي شوية زيت وحطي البطاطس وسيبيها تستوي لحد ما تاخد لون بني من تحت.
– ضيفي رشة زعتر وربع ملعقة صغيرة من الملح والفلفل الأسود وقلبيها لحد ما تستوي حوالي 5 : 7 دقيقة. انقليها في طبق وسيبيها على جنب.
– ارفعي النار متوسطة – عالية وضيفي المزيد من الزيت في نفس الطاسة وضيفي مكعبات اللحمة تاخد صدمة وبعدين قلبيها على الجنب التاني لمدة 30 ثانية.
– ضيفي نصف معلقة كبيرة من الزبدة والثوم المفروم، وقلبي وسيبيها شوية لحد ما ريحة الثوم تظهر.
– ضيفي البطاطس وقلبي مكعبات اللحم البقري والبطاطس بسرعة.
قللي النار شوية وضيفي معلقة كبيرة زبدة و 1.5 معلقة صويا صوص وقلبيهم لحد ما يمتزجوا كويس.
– اظبطي التوابل حسب رغبتك واطفي النار وانقلي مكعبات اللحمة والبطاطس في أطباق التقديم ورشي بقدونس مفروم وقدميه.
قوارب البطاطس بالجبنة
المقادير:
8 حبات بطاطس متوسطة الحجم
نصف كوب زبدة
2 معلقة كبيرة بقدونس مفروم طازج
ملح وفلفل حسب الذوق
نصف كوب حليب مبخر (أو أكثر حسب الحاجة)
اختياري للنكهة: مرق دجاج او ساور كريم او ثوم بودر
كوب جبنة شيدر مبشورة او موتزاريلا
طريقة التحضير:
سخني الفرن مسبقًا إلى 190 درجة وبطني صينية بورق الزبدة. اغسلي البطاطس وخرميها بالشوكة او السكينة كذا مرة. ادهنيها بقليل من زيت الزيتون وحطيها في الصينية ودخليها الفرن لحد ما تبقى طرية حوالي 50 : 60 دقيقة.
طلعيها وسيبيها لمدة 10-15 دقيقة لحد ما تبرد وتعرفي تعاملي معاها.
قطعيها نصين بالطول بحيث تكون شكل قوارب.
فرغي البطاطس من الداخل بالملعقة وحافظي على القشرة الخارجية بشوية من قلب البطاطس ونحط اللي نفرغه في طبق.
الجزء اللي فرغتيه ضيفي عليه ضيفي الزبدة والملح والفلفل والبقدونس والحليب المبخر وأي توابل من اختيارك للنكهة.
اهرسيها باستخدام هراسة البطاطس واضربيها بالمضرب لحد ماتبقى ناعمة، ضيفي المزيد من الحليب إذا لزم الامر. احشي القوارب بالخليط وخلي على الوش الجبنة الشيدر او الموزاريلا ورجعيها الفرن 5 : 10 دقايق تحت الشواية لحد ما الجبنة تسيح وتعمل فقاعات.
البطاطس المكسيكية
المقادير:
كيلو بطاطس مكعبات
معلقة كبيرة زيت
بصلة مفرومة
ثوم مفروم
نصف معلقة صغيرة شطه
نصف معلقة صغيرة بابريكا
معلقة صغيرة كمون
طريقة التحضير:
– هنسلق البطاطس لمدة ٥ دقايق وفي طاسه هنسخن الزيت ونشوح البصل وبعدين نحط عليه التوم والتوابل.
– هنصفي البطاطس ونحطها في الطاسه ونقلبها مع باقي المكونات لحد اما تكمل سواها وتبقي طريه.
البطاطس اللبنانية
المقادير:
كيلو بطاطس تحمير
4 فصوص ثوم
ربع كوب كزبرة خضراء مفرومة
معلقتان زيت زيتون
بابريكا
بودرة فلفل احمر حار
ملح وفلفل
عصير ليمونه
الخطوات
هنقطع البطاطس مكعبات صغيره ونقليها في الزيت لحد اما لونها يبقي دهبي في طاسة هنحط بقية المكونات ونقلبها شويه ونحط عليها البطاطس ونقلب شويه كمان لحد ما تتجانس المكونات مع بعضها
بطاطس مهروسة بالثوم والزبدة
المقادير:
4 حبات بطاطس مسلوقه ومبشورة
معلقة صغيرة ملح
ربع كوب حليب
3 فصوص ثوم مهروس
4 معالق كبار زبدة
بقدونس مفروم للتزيين
طريقه التحضير:
– نهرس البطاطس مع الزبدة والحليب في طبق لحد ما الخليط يبقي ناعم ومتجانس وبعدين نضيف الثوم والملح ونقلب كويس
– نغرف البطاطس في طبق التقديم ونوزع فوقها البقدونس المفروم ونقدمها مع اللحمة أو الفراخ المشويه حسب الرغبه.
