الجن انواع كتير منهم الطيب والشرير بينقسموا لقبائل وليهم حياه زي البشر بالظبط وعالم صعب انا وانت نتوقعه…. منهم الدرجه الاعلي المرده والشياطين والي بتكون اشد خطوره واذي
واستدعاء اي حد منهم حتي لو كان جن طيب ومش مؤذي ما هو الا كفر بالله تعالي
……….
مش مهم دلوقتي انا فين انا حصنت نفسي منهم عشان أكون مستعد للمواجهه دي… خرجت ومشيت في طريقي ناحيه البيت الي دمر حياتي وحولها لجحيم…. وصلت بعد نص الليل البيت ضلمه لكن الباب كان موارب فتحته ودخلت اول ما دخلت الباب اترزع واتقفل ومن العدم بدأ يترسم علي الارض نجمه خماسيه بتحاط بحروف مقلوبه وكانت منوره في الضلمة… حسيت اني بتخنق وقبل ما انطق سمعت صوت من ورايا بيقولي بابا انت بتعمل ايه هنا…. اتلفت ورايا بسرعه وكانت الصدمه
………….
#جحيم_جدتي
#الجزءالاول
انا اسمي الشيخ صادق عندي 45سنه متزوج من كريمه وعندي ولد وبنت…. طارق وامل…. احنا عايشين في احدي محافظات الصعيد وبالتحديد في قريه بدون ذكر اسمها….. اهل القريه دايما بيلجؤا ليا في حل المشاكل… جايز عشان انا شيخ الجامع وجايز عشان انا البركه الي بيعالج الناس من المس والسحر والحسد…. حياتي بسيطة جداً ياما عالجت ناس من اسحار واعمال وواجهت الجن وانتصرت عليه بفضل ربنا…… قصتي بتبدأ من يوم جمعة بعد الصلاة مباشره كنت قاعد بقري قرأن لاحظت ان فيه شاب قاعد ومش علي بعضه… عينيه من كتر الدموع احمرت وواضح عليه التعب….. قرب مني وقال السلام عليكم يا مولانا… وعليكم السلام اؤمرني مالك انت شكلك تعبان…. قلي جدا يا شيخ ومحتاج مساعدتك انا جاي من مصر لاني سمعت عنك كل خير وانك الي هتقدر تحللي مشكلتي….. قولتله طيب ان شاءلله خير قوم معايا عشان نروح البيت عندي….. لا يا عم الشيخ خليني هنا بره المسجد مش هيسبوني اتكلم…. قولتله هما مين…. قلي ارجوك خلينا هنا… قولتله طيب احكي…. قلي انا اسمي اشرف عندي دلوقتي 24سنه عايش مع بابا وماما واخويا فارس واختي جميله في بيت كبير جدا احنا حالتنا الماديه كويسه جدا… الحياة كانت ماشيه ومستقره لحد ما جات وسكنت معانا جدتي فوزيه.. وقتها كان سني 20 سنه وفارس كان 17 سنه وجميله كانت 14 سنه…… لاحظت من اول دخول جدتي البيت ان ابويا وامي مش مبسوطين… جدتي فوزيه تبقي ام ابويا….. رحبنا بيها انا واخواتي لكن كانت مش بتتكلم بتهز راسها كده وخلاص…. المهم اتجهز اوضه عشان تعيش فيها جدتي… وفي اول ليله حصلت اول حاجه مرعبه….. كنت نايم الساعه كانت 2بليل.. قلقت من غير سبب وكنت عايز ادخل الحمام قومت من مكان وخرجت من الاوضه…. لمحت حد قاعد في صاله البيت مغطي جسمه بملايه وبيتحرك لورا ولقدام زي الي في حاله ذكر كده…. قربت وكانت جدتي فوزيه….. نديت عليها وقولتلها.. جدتي انتي كويسه.. جدتي انتي بتعملي اي.. كنت سامع همس طالع منها.. الفضول دفعني ارفع الملايه من عليها ورفعتها… اعوذ بالله علي المنظر الي شوفته عينين جدتي كانت بيضه كلها وكان نازل منهم خطين دم…. رجعت لورا اتكعبلت ووقعت وقومت اجري علي اوضه بابا وماما.. فضلت اخبط زي المجنون…. فتحلي بابا وقلي في اي مالك…. قولتله علي الي شوفته…. قلي مفيش حاجه ارجع اوضتك… ولقيته رايح اوضه جدتي وسمعته بيزعق معاها وبيقولها انتي لو مبطلتيش الشغل بتاعك ده انا هطردك من هنا.. انا عندي عيال عاوز اربيها…. وخرج ورجع اوضته… حاولت انام تانى لكني معرفتش وفضلت سهران لحد الصبح…. لحد ما لقيت ماما بتندهني عشان الفطار… رحت وقعدت علي السفره كنت بحاول مبصش لجدتي مش عاوز افتكر المنظر الي شوفته امبارح…. لكن لاحظت حاجه غريبه جدتي بتاكل من طبق واحد خاص بيها ومش بتاكل معانا…. فارس اتكلم وقال هي جدتي مش بتاكل معانا ليه….. ردت ماما بكلام في نوع من السخريه وقالت اصل جدتكم بتاكل الاكل من غير ملح……. بابا ادخل وقال بلاش كلام علي الاكل وكل واحد يخلص فطاره وعلي مدرسته…. انا نسيت اقولك يا شيخ اني بدرس في كليه طب… وفارس كان في ثانوي… وجميله كانت في اعدادي….. المهم رجعت اوضتي مش قادر اروح الكليه قولت هروح انام شويه اعوض اليوم ونمت….. معرفش نمت قد اي لكني صحيت علي صوت ماما بتقولي الغدا جاهز….. قومت واتغديت والمشهد بيتكرر جدتي بتاكل من طبق خاص لوحدها….. اتغديت وخرجت شويه مع صحابي والوقت سرقني ورجعت متأخر…. البيت كله نايم.. دخلت لكن لقيت جدتي قاعده علي الارض وبترسم حاجه….. قربت كانت حروف بالمقلوب… بمجرد ما شوفتها حسيت اني بتخنق وقولت اعوذ بالله من الشيطان الرجيم اتلفتت ليا جدتي وصرخت…. وكل حاجه اختفت ولقيت جدتي بتقوم وبترجع اوضتها بهدوء.. اي الي بتعمله جدتي….. مش عارف المره دي محكتش لحد وعدا اليوم بشكل عادي ويوم بيجر يوم ومفيش حاجه بتحصل تاني… لكن في يوم قومت من النوم ولقيت دماغي تقيله بصيت في الساعه 10بليل… قومت من مكاني وخرجت من الاوضه… لقيت جدتي قاعده مع اختي وبترسم حاجه علي جبينها… قربت منهم كانت نجمه خماسيه… شديت اختي من قدامها قولتلها انتي بتعملي اي وزعقت لجميله وقولتلها ادخلي لماما عاوزكي…. جدتي كانت مش بتتكلم خالص بصالي وساكته… روحت الاوضه لماما لقيتها بتزعق وبتقول الست دي لا يمكن تقعد دقيقه تاني في البيت ده… ابويا كان بيقولها اهدي… قلتله لا مش ههدي وخرجت من الاوضه وانا وراها ودخلت اوضه جدتي وصرخت..ليه؟.. عشان لقينا تعبان كبير في اوضه جدتي…. بابا جيه بسرعه ودخل الاوضه وشاف المنظر جري جاب عصايا كبيره ونزل ضرب علي دماغه لحد ما مات…. في اللحظة دي جدتي دخلت الاوضه واول ما شافت المنظر صرخت وقالت مش هيسبوكم هينتقموا منكم…. اخرجوا بره… ودي كانت اول مره اسمع فيها جدتي بتتكلم…. خرجنا كلنا وقعدنا مع بعض والكل متفق ان جدتي فوزيه لازم تمشي لكن سمعنا صوت صراخ مش طبيعي جاي من اوضه جدتي جرينا بسرعه وفتحنا الباب وكانت الصدمة
..
لقينا الي محدش يتوقعه ومحدش عارف ده حصل ازاي.. المنظر جوه بشع ومقرف لاقصي درجه والريحه لا تطاق…. علي السرير جثه جدتي جسمها محروق متفحم وكأنها لسه النار كانت ماسكه فيها من دقيقه….. ما بين صراخ امي على المنظر وفقدان اختي الوعي لاحظت ان حيطان الاوضه عليها حروف وارقام مقلوبه…. ورسمه لافعي كبيره زي الي بابا قتلها بالظبط…. منظر جدتي وهي ميته لو هوصفه اقدر اقول اني شايف ست بتصرخ سنانها متكسره وشها المتفحم مخلي منظرها مرعب اكتر….. بلغنا طبعا الشرطه الي جات وفتحت تحقيق وسبب الحريق اي واتقال عليها دجاله كانت بتمارس السحر…. لكن مش هنسي ابدا لما جات المغسله عشان تغسل جدتي وتكفنها….. الست دخلت الاوضه وبعد عشر دقايق خرجت بتصرخ…. دخلت الاوضه عشان اشوف فيه اي… ودان ومنخير جدتي بيخرج منهم دود ايوه دود اسود قذر… حاجه صعبه ومقرفه… الست خلصت بالعافية بمساعدة امي…… ودفناها وعملنا العزا والغريب محدش حضر لا جنازه ولا عزا ولما سألت بابا عن الكلام الي بيتقال علي جدتي وليه محدش حضر جنازة ولا عزا قلي…. بص يا اشرف انسى كل حاجه تتعلق بالست دي… اقولك اعتبرها مجتش ولا سكنت معانا…. كلام بابا كان صارم جدا وبطريقه خلتني اخاف اسأله تانى عن جدتي… حاولت اتناسي الموضوع وارجع لحياتي لكن واضح ان ده كان مش سهل… بعد ما عدا علي وفاة جدتي الاربعين يوم… كنت في يوم نايم صحيت علي صوت همس واصوات متداخلة بشكل مش مفهوم…. الأوضة ضلمه مش شايف حاجه نورت نور الابجوره وصرخت.. اختي جميلة واقفه في وشي عينيها بيضه ونازل من عينيها خطين دم ده نفس الي حصل لما شوفت جدتي… حاولت اتحرك انا اتشليت واتلزقت في السرير مش عارف اتحرك…. لقتني بقولها مالك يا جميلة… ابتسمت بخبث وقلتلي انا مش جميله وبدأت تفتح بوقها لسانها كان مشقوق زي التعابين…. عاوز أقرأ اي حاجه من القرآن او اي ادعيه…. نسيت كل حاجه دماغي تقلت وكل ده هي لسه واقفه في وشي لكن فجأه صوت اذان الفجر الي كان نجده ليا والي معاه بدأت ملامحها تتغير وشها اسود جلدها كرمش وبدأ يطلع منها صوت وكأنها بتتعذب او حد بيضربها واختفت.. حاولت اقنع نفسي ان كل ده وهم واني كنت نايم وان كل ده كابوس….. وفي النهار لاحظت ان جميله مش بتاكل وبتقلب في طبقها ولما سألتها مالك يا جميلة…. قلتلي انها بتشوف كوابيس وحشه وبتحلم بجدتي وانها عاوزه تاخدها معاها…. بابا وماما كانوا قلقانين من كلام جميلة….. لكن انا كانت في حاجه مخوفاني اوضه جدتي الي كانت عايشه فيها… الاوضه دي كانت بيتعمل فيها بلاوي.. قفلنا الاوضه كويس…. باب قال انه هينزل يجيب شويه طلبات وفعلا نزل وانا رحت الكليه وكل واحد راح مصلحته… وبعد ساعه جالي تليفون الو مين…. استاذ اشرف والدك عمل حادثه وهو دلوقتي في المستشفى ياريت تيجي بسرعه… جريت علي المستشفى ووصلت الدكتور قرب مني وابتسم لما عرف اني اشرف وقال ابوك كويس اطمن… دخلت عشان اطمن عليه وقلي… انا كويس يبني قولتله حصل اي ده انت حتي بتسوق كويس…. قلي مش هتسبينا يبني هي السبب… قولتله هي مين… قلي جدتك انا شوفتها في مرايه العربيه كانت قاعده في الكنبة الي ورا…… طمن والدي ان كل حاجه هتكون بخير… رجعنا البيت شغلنا قرآن كنت متوقع تحصل حاجه لكن مفيش اي حاجه…. نمت علي صوت القرآن.. صحيت في نص الليل من غير سبب قومت من السرير وقولت اقوم اشرب فنجان قهوة وانا داخل المطبخ شوفت الي خلاني ارجع وابص كويس دي اوضه جدتي مفتوحه…. اعوذ بالله من الشيطان الرجيم انا قافلها بايدي اتفتحت ازاي قربت منها بحذر خايف وقلقان… وبصيت جوا الاوضه….. بليغ بليغ مهياش مهياش ماقر ماقر بحق هذه الاسماء اجيبوا وبحق خدام حرف الالف توكلوا علي صاحبه هذا الجسد…. اختي جميلة وقاعد قدامها كيان اسود مش باين منه اي ملامح حاطط ايده علي راسها ويكرر الكلام ده… دخلت الاوضه وانا بقول اعوذ بالله من الشيطان الرجيم… انصرف انصرف… اختفي واختي فقدت الوعي ومن يومها البيت بقا جحيم كل يوم مصايب واختي بقيت مربوطة في السرير علي جسمها بقع زرقه وهالات سوده تحت عينيها عشان لما بنفكها بتأذينا وتأذي نفسها..لحد لما قابلت واحد صحبي في الكليه معايا اسمه عماد من بلدكم وهو الي دلني عليك وقلي انك هتقدر تحل مشكلتي ..خلص اشرف كلامه وانا في حاله من الصمت وقلي العمل اي يا شيخ صادق….. قولتله لازم اجي البيت ده بنفسي بس الي فهمته ان التعبان الي والدك قتله كان خادم سحر وده السبب في المصايب الي بتحصل…. انت بيتك فين… في القاهره……. كده فيه مشكله انا هسيب عيلتي واسافر ازاي دلوقتي معلش يبني انا كل الحالات الي بعالجها من اهل البلد انت اول حاله من بره… رد عليا وقال البيت كبير جدا يا شيخ صادق هات مراتك وولادك معاك…. بدأت اعقل الكلام وقولتله ربنا يسهل….. وطلبت منه يستناتي هنا في الجامع وهرجعله ورحت البيت وقولت لمراتي هنروح القاهره في حاله مستعجله هناك والراجل لجألي وانا مش هكسفه جهزي حالك انتي والعيال عشان هنسافر القاهره النهارده….. معلقتش قلتلي حاضر… ورجعت قعدت مع اشرف لحد ما اتصلت بيا وقلتلي احنا جاهزين…. اخدتها هيا والعيال وكان معانا استاذ اشرف وركبنا القطر في طريقنا لبيت الجحيم علي حسب وصف اشرف….. وصلنا تاني يوم الصبح للبيت.. بيت كبير من دورين اشبه بفيلا من الخارج… دخلنا ورحبوا بينا والد ووالده اشرف وفارس اخوه… اخدنا اوضتين في الطابق التاني… وبعدها انا نزلت وقولتلهم عايز اشوف جميله.. دخلوني اوضه وجوا الاوضه بنت شابه مربوطه علي السرير نحيفه هزيله تحت عينيها اسود وجسمها مليان بقع زرقه…. اتكلمت وقولت اعوذ بالله من كل شيطان مريد…. اعوذ بكلمات الله التامات من شر ما خلق…. صرخت وقلتلي بصوت تخين غليظ اخرج بره هأذيك يا صادق انت مش قدي……. خد مراتك وعيالك وامشي من هنا يا صادق…. قريت آيه الكرسي….عينيها نزل منها خطين دم.. سمعت صوت صرخه جايه لكن من بره… خرجت اجري وكانت الصدمه
……
يتبع الجزء الثاني
#جحيم_جدتي
#الجزءالتاني_والأخير
لما خرجت بره الاوضه لقيت الصراخ جاي من الدور التاني.. الدور الي فيه مراتي وعيالي.. طلعت اجري لفوق دخلت الاوضه لقيت مراتي وعيالي متكومين كده في ركن وبيشاوروا علي حاجه قدامهم لما بصيت كانت افعي ايوه زي الي حكالي عنها اشرف بالظبط….. وقفت مبرق من حجمها الكبير وقولت انصرف باسم الله الاعظم… انصرف.. خرجت من الشباك في هدوء… مراتي قلتلي انا عاوزه امشي من هنا انا وعيالي… اهدي شويه مفيش حاجه تاني هتحصل ان شاءلله…. قلتلي لا انا مش هستني لما تحصل حاجه…. قولتلك خلاص اهدي وبعدين مفيش مشي من هنا غير وكلنا مع بعض….. نزلت تحت سألني اشرف هو حصل اي يا شيخ صادق… قولتله مفيش يا اشرف خير ان شاءلله انا بس محتاج اقعد معاكم في كلام مهم لازم نقوله…. وفعلا قعدنا في الصاله انا واشرف ووالده ووالدته…. قولتلهم بكل حزم اسمعوني بقا انا مش هعرف اتصرف ولا احل حاجه غير لما اعرف مين فوزيه دي وحكايتها اي… والد اشرف بصلي وقال بتوتر احنا منعرفش حاجه عنها…. قولتله يعني اي متعرفش حاجه عن والدتك يعني قول كلام يدخل العقل…. ردت عليا والده اشرف وقالت احنا طول عمرنا بعيد عنها ومش بنسمع اي حاجه بخصوصها لحد ما بيتها وقع وجات تعيش معانا….. خلاص يا اشرف انا هقوم اخد مراتي وعيالي وامشي طالما والدك ووالدتك رافضين الكلام…. لقيت اشرف بيقولي اهدي بس يا مولانا وبص لابوه وقاله كفايه كده يا بابا اتكلم خلينا نعرف نحل المشكله دي….. رد عليه وقال اتكلم اقول اي الي حصل زمان صعب يتصدق…. رديت عليه وقولتله لا يا سيدي انا هصدقك بس احكي….. الراجل اتنهد كده وخد نفس وقال ابويا كان بيشتغل دجال البلد كلها كانت بتكرهوا كان مؤذي الشيطان يتعلم منه كان عامل عهد مع جن ملعون وكان مسخر ليه خادم يكون معاه في كل مكان كان الخادم ده متشكل في افعي… كان بيقدم قرابين مقابل فلوس كتير وعيشه مرتاحه ومكنش يعرف ان نهايته هتكون القتل….. كان سني وقتها 17سنه لما لقيت ابويا مقتول في المقابر…. الخادم ظهر لامي بشكله الحقيقي وقالها انها لازم تكمل مسيره جوزها وتكمل العهد في الاول رفضت لكن بعدها وافقت لانها كانت خايفه علينا انا واختي وفاء…لكن امي الست الطيبه الي كانت تعرف ربنا كويس اتغيرت لواحده كافره بتمارس السحر والدجل وعايشه علي اذيه الناس….. وكانت برضو بتقدم القربان بقينا عايشين انا واختي مع كيان شيطاني…. لحد لما الجن طلب اختي قربان حاولت امي ترفض لكن الجن قالها لو رفضتي هتموتي معندكيش حل تانى….. والمصيبه انها وافقت لحد دلوقتي مش قادر انسي منظرها وهي بتدبح اختي قدام عينيا…. جريت هربت من البيت ورحت عشت عند عمي وقعدت فتره وانا خايف توصلي وتأذيني ورجعت بعد كل العمر ده عشان تقلب حياتي لجحيم اديني حكتلك يا شيخ صادق حاول تتصرف وتنقذ بنتي….. خلص كلامه وفهمت ليه مكنش عايز يحكي…. قولتلهم هيا فين الاوضه الي كانت عايشه فيها….اشرف شاورلي عليها…. قربت منها وفتحت الباب ودخلت الحطيان فعلاً مليانه رسومات غريبه…. ريحه الاوضه كانت لا تطاق ريحتهم القذره انا عارفها كويس.. قربت من الحيطه عاوز افهم الرموز والاشكال دي…. سألني اشرف هي اي الحروف دي يا مولانا قولتله الحروف دي بترمز لقبيله اسمها بني غيلان صفاتهم خداع البني ادمين والمكر والاذيه والدمار…. خرجت بره الاوضه وقولتلهم عايز ملح خشن كل ركن في البيت ده يتغسل بميه وملح بعد صلاه العشاء وتشغلوا سوره البقره وبعدها انا هتصرف….. انا هروح انام دلوقتي عشان مرهق من السفر وصحوني علي المغرب…. طلعت اوضتي مراتي كانت نايمه فردت جسمي علي السرير ونمت نمت نوم عميق… صحيت علي صوت همس مش فاهم من حاجه اتعدلت عشان اشوف فيه اي الدنيا حواليا ضلمه كحل مش شايف حاجه لكن فجأه ايد كلها شعر طبقت علي رقبتي وسمعت صوت غليظ بيقولي ارحل يا صادق اوعاك تفكر تتحداني أرحل يا صادق….. بحاول اخلص نفسي لكن مش عارف…….. شيخ صادق مالك يا شيخ صادق…. ها ها قومت مفزوع ده كابوس الحمدلله الحمدلله…… قومت وصليت المغرب ودعيت…. جهزت كل حاجه وبعد صلاة العشاء بدأت امسح البيت كله بميه وملح… وانا بقول اقسمت عليكم باسم الله الاعظم الا تظهروا لنا ولا تأذوننا…… ودخلت الأوضة علي جميله وانا بقول اعوذ بكلمات الله التامات من شر ما خلق
بسم الله الرحمن الرحيم
وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحر
صدق الله العظيم
اللَّـهُ لَا إِلَـٰهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَّهُ مَا فِي السَّمَاوَاتِ وَمَا فِي الْأَرْضِ مَن ذَا الَّذِي يَشْفَعُ عِندَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ
صدق الله العظيم
البابان والشبابيك بدأت تترزع وتتفتح وتتقفل بعنف صوت صراخ هيستيري طالع من جميله جسمها بيظهر عليه اثار ضرب…. وسمعت اشرف بيقول الحق يا شيخ صادق.. اتلفت ورايا لقيت اوضه فوزيه النار ماسكه فيها….. رجعت تاني لجميله وانا بقول اخرج باسم الله الاعظم اخرج بحق لا اله الا الله… فضل يقولي اسكت هأذيك وهقتلها يا صادق…. فضلت اقرأ اكتر واعلي صوتي اكتر…. شهقت جميله بقوه وفقدت الوعي…. ناديت علي اهلها الي دخلوا وقولتلهم خرج من عليها الحمدلله…. خرجت لبره عرقان وقولتلهم هو خرج من علي بنتكم لكن هو لسه موجود في البيت…. وعدت الليله وتاني يوم فاقت جميلة ومكنتش فاكره اي حاجة وبدأت ترجع لحياتها خلاص…. واتعرفت علي امل وطارق وبدأت تعاملهم زي اخواتها…. لحد ما في يوم كنت نايم وحلمت اني واقف قدام قبر قديم ومتهالك….. ومن العدم ظهر دخان كثيف واتشكل علي كائن مفزع مقرف بشع بعين واحده وقلي هتندم يا صادق بكره هتكون اخر ليله ليك هنا بكره يا صادق….. صحيت من النوم لقيتها 10 الصبح استعذت بالله من الشيطان الرجيم…. قومت واطمنت على الولاد وكان اليوم ماشي طبيعي…. لحد بليل كان اشرف بيتكلم معايا وسمعت حاجه اتهبدت من مكان عال وصوت صرخه خلعت قلبي كن مكانه جريت ناحيه مصدر الصوت وكانت الصدمه
…..
اتصدمت من الي شوفته حسيت اني اتشليت وانا شايف جثه بنتي امل قدام عينيا.. بنتي امل ماتت.. بصيت من مكان ما وقعت.. لقيت جميله واقفه بتصرخ وبتقول وقعت لوحدها والله ما عملت حاجه… صمت دموع صراخ مراتي شق الليل جريت علي جثه بنتي وحضنتها وفضلت تبكي… انا واقف مصدوم ومبرق مش مصدق ولا قادر اصدق الي حصل ده يعني اي يعني انتقم مني في بنتي….. مراتي بدأت تضرب فيا وتقولي انت السبب انت الي قتلتها انت السبب…..مفيش دقيقه وسمعت صراخ هيستيري طالع من البيت والنار بدأت تمسك في كل ركن في البيت… دخلت بسرعه جبت ابني طارق من جوه واشرف خرج عيلته بسرعه بره البيت…. شيلت جثه بنتي من علي الارض ومشينا….. وروحنا كلنا بيت ناس قرايب اشرف….. تخيل داخل علي ناس متعرفهمش بجثه لكن بصراحه الناس اتعطفت معانا… دخلنا جوه الاوضه الي هنغسل فيها بنتي…… الدموع في عينيا والسؤال ليه ليه بنتي ليه يارب، غلسناها وكفناها ودفناها….. وقفت قدام القبر ابكي وادعيلها وقولتلها سامحيني يا بنتي انا السبب…. لقيت اشرف بيطبطب عليا وبيقولي اهدي يا شيخ صادق راحت للاحسن مني ومنك….. رجعت بلدي في الصعيد انا ومراتي وابني.. عملت عزا كبير.. كل الناس كانت بتسأل ده حصل ازاي… لكن انا مكنتش بتكلم كنت رافض اتكلم مع اي حد…… حبست نفسي في اوضتي بعد انتهاء ايام العزا مش عايز اتكلم ولا اشوف حد احساسي اني السبب في موتها مخليني عاجز عن التفكير في اي حاجه
بفكر في حاجه واحده الانتقام…. ايوه الانتقام…… حاولت اتكلم مع مراتي لكن دايما تقولي انا عمري ما هسامحك انت السبب في موت بنتي ياما قولتلك بطل الشغلانه دي احنا مش قدهم لكن الي في دماغك في دماغك وادي النتيجة….. بقيت انام لوحدي في الاوضه نومي قل لحد ما في يوم تليفوني رن كان مين كان اشرف… الو ايوه يا اشرف…. شيخ صادق انا مش عارف اتكلم واقول اي انا عارف ان الي حصل بسبب عيلتي لكن انا معرفش غيرك عشان الجأ ليه دلوقتي….. قولتله خير يا اشرف…. قلي مش سيباني في حالنا يا شيخ صادق لسه المصايب شغاله علي دماغنا…. وبابا بيشوف كوابيس مفزعه كل يوم….. قولتله حاضر يا اشرف هرجع…. وفعلا تانى يوم جهزت شطنتي عشان اسافر… مراتي شافتني وقلتلي انت رايح فين…. قولتلها راجع اجيب حق بنتي… قلتلي لسه الي في دماغك هو هو والمره دي مين هيموت….. انت مش هتخرج من هنا انا مش مستغنيه عنك لا انت ولا ابني….. قولتلها لازم ارجع مش هسيب حق بنتي…. قلتلي حق اي هتاخد حقك من الجن… قولتلها اه هاخد حقي من الجن وخرجت ركبت القطر ورجعت القاهره رحت على طول علي بيت قرايب اشرف الي قاعدين عندهم….. دخلت وحصنت اشرف وعيلته كلها وقريت سوره البقره وايه الكرسي وبعض الأدعية….. لقيت والد اشرف بيقولي انا خبيت عنك حاجه او بمعني اوضح كدبنا عليك في حاجه….. قولتله حاجه اي…. قلي امي بيتها موقعش… امي اهل البلد طردوها عشان كده جيت تعيش معانا….. قولتله وهو البيت ده فين قلي في المنصوره وداني العنوان…. خرجت عندي رهبه وفي نفس الوقت شغف الانتقام مسيطر عليا اخدت مواصله لحد البلد الي فيها البيت الي كانت فوزيه عايشه فيه….. سألت اهل البلد عن البيت لكن الكل كان بيبصلي برعب…. لحد لما سألت راجل كبير وقلي بتسأل عن البيت ده ليه امشي من هنا…. قولتله لا مش همشي وقولي البيت فين…. لقيته بيشاور ورايا… اتلفت ورايا كان بيت من طين متهالك…. قربت ناحيه الباب وفتحته ريحه هبت ريحه عفن…. فضلت اكح ودخلت الحيطان كلها رسومات غريبه زي الرسومات الي شوفتها قبل كده بيت مقبض حاسس اني مخنوق… لكني بدأت اسمع صوت صراخ مكتوم جاي من اوضه معينه…. فتحت الاوضه واتصدمت بنت في ال30 من عمرها متكتفه.. دخلت بسرعه فكيتها وسألتها انتي مين… قلتلي انا مسعده مساعده الست فوزيه…. ومين الي ربطك كده…. قلتلي الست فوزيه هي الي ربطتني عشان قررت اتوب… قولتلها انا عايز اعرف حكايه الست دي اي…. قلتلي دي ست كافره بتعمل اعمال وبتأذي الناس ومعاها خادم سحر قوي جدا من قبيله بني غيلان….انا ياما شوفتها بتأذي وبتفرق وبتقتل انا عشت معاها اسود ايام حياتي ولما قررت اتوب ربطتني من غير اكل او شرب انا كنت هموت لو انت مجتش…. قولتلها انا عايز سرها حاجه تخلصني منها…. سكتت البنت شويه وبعدها قامت وفتحت دولاب وخرجت منه كيس وقلتلي المكان الي اتأذيت فيه دور فيه علي نجمه خماسيه وحط الكيس ده في وسط النجمه وولع فيه… قولتلها هو اي ده…. قلتلي ده سر الست فوزيه…… اهدت الكيس ورجعت البيت عند اشرف طلبت اقعد في اوضه لوحدي عايز اعمل خلوه….. وبعدها خرجت ورحت مكان محدش يعرفه غيري عشان احصن نفسي…. مش مهم دلوقتي انا فين انا حصنت نفسي منهم عشان أكون مستعد للمواجهه دي… خرجت ومشيت في طريقي ناحيه البيت الي دمر حياتي وحولها لجحيم…. وصلت بعد نص الليل البيت ضلمه لكن الباب كان موارب فتحته ودخلت اول ما دخلت الباب اترزع واتقفل ومن العدم بدأ يترسم علي الارض نجمه خماسيه بتحاط بحروف مقلوبه وكانت منوره في الضلمة… حسيت اني بتخنق وقبل ما انطق سمعت صوت من ورايا بيقولي بابا انت بتعمل ايه هنا…. اتلفت ورايا بسرعه وكانت الصدمه….. بنتي جيت اقرب منها لكن ازاي هتخدع بالسهولة دي… رجعت تاني وقولت بسم الله الاعظم نبدأ… بسم الله الاعظم نحتجب… اعوذ بالله من الشيطان الرجيم… اعوذ بالله من كل شيطان مريد… أعوذ بكلمات الله التامة من كل شيطان وهامة ومن كل عين لامة أعوذ بكلمات الله التامات التي لا يجاوزهن بر ولا فاجر من شر ما خلق وذرأ وبرأ، ومن شر ما ينزل من السماء ومن شر ما يعرج فيها، ومن شر ما ذرأ في الأرض ومن شر ما يخرج منها، ومن شر طوارق الليل والنهار ومن شر كل طارق إلا طارقا يطرق بخير يا رحمان….. وقريت ايه الكرسي… ظهر من العدم بمنظره البشع وقالي لسه فيك نفس يا صادق المره دي هقتلك انت وعيلتك كلها….. خرجت من جيبي الكيس بسرعه وانا بقول يا من الجمت كل متمرد سلم يارب سلم وولعت في الكيس ورميته في نص النجمه الخماسيه النار مسكت في النجمه والحروف وكأنها بتزود… الشيطان صرخ والبيت اتهز زي ما يكون فيه زلزال فضلت اقري قرآن لحد ما اتحرق واتحول جسمه لرماد…. خرجت من البيت ورجعت لاشرف واهله كانوا بخير وطمنتهم انه خلاص مفيش مشاكل تانى هتحصل… ورجعت بلدي…. رجعت لبيتي لمراتي وابني………. رغم الخساير الا اننا مش لازم نستسلم ولازم الخير في النهاية ينتصر
…..
تمت
…..
