قصه الجن العاشق

القصة اللي جايه احكيهالكم حصلت من سنة تقريبا.. انا ست متجوزه هي حصلت مع جوزي.. دايما محمد جوزي متعود انه يحلق دقنه بليل بيفضل قدام المرايا ساعة يفضل يحلق.. كنت دايما بقوله ليه بتحلق بليل ما عندك الصبح او العصر تحلق فيه اشمعنى بليل يعني.. كان بيقولي ان الوقت ده اللي بيكون فاضي فيه.. فضل فتره على كده كل ما يجي يحلق يفضل بالساعات قدام المرايا.. لحد ما حصل حاجة مكنتش متوقعاها.. علاقتنا بدات تسوء … ودايما كنا بنتخانق مع بعض على اتفه الاسباب.. مش كده وبس ده كمان بدا يبعد عني وكان بينام في اوضة العيال ولما كنت اقوله ليه بتنام في اوضة العيال.. كان بيتحجج ويقولي اصلي خايف عليهم ومش عايزهم يناموا لوحدهم.. كانت تلكيك لان العيال متعودين يناموا لوحدهم .. فضل على الحال ده لفترة لحد ما حصل اللي خلاني اترعب! في يوم صحيت على صوت صريخ جامد لست! صحيت مخضوضة من النوم والصوت ده كان جاي من بره اوضتي.. قمت ورحت اشوف العيال يمكن الصوت جاي من بنتي الصغيرة.. بس لما دخلت الاوضة لقيتهم نايمين جنب ابوهم ومافيش حاجة..

رجعت اوضتي انام.. واول ما حطيت دماغي على المخدة صوت الصريخ رجع تاني ! صوت الصريخ المرة دي كان جاي من اوضتي.. ست عمالة تصرخ ومش شيفاها هو صوت مجهول معرفش هو جاي منين بظبط! الوضع استمر فترة.. كنت بكره الليل عشان الاصوات اللي بسمعها.. حكيت لجوزي وقالي انتي بتتوهمي ! كان ردوده عليا مستفزة ومكنش مهتم اصلا بالي بحكيه.. فاقنعت نفسي ان فعلا بتوهم وان الاصوات دي مش حقيقية… بس اللي حصل بعد كده خلاني اتاكد ان ف حاجة غلط بتحصل!..

في يوم بليل صحيت من النوم وكنت عايزه ادخل الحمام.. طلعت من اوضتي واول ما رحت للصالة بدات اسمع صوت خبط جامد جاي من الحيطان! كأن اكتر من حد ماسكين شواكيش وعمالين يخبطو ع الحيطة! فضلت اتلفت حواليا وسامعه اصوات الخبط ده جاي من كل حيطان الشقة! كنت ميته من الخوف ! بس فجاة الصوت وقف وجوزي لقيته خارج من اوضة العيال.. لما شافني واقفه وميته من الخوف قالي مالك وقفه ف نص الليل كده ليه.. قلت له وانا بزعق له ان اللي بيحصلي مش فهماه وانت كمان بدات تتغير ومش بتنام معايا ف الاوضة .. وكمان سايبني بقالك شهرين ع الحال ده انا عملت لك ايه عشان تعمل كده معايا! بكل برود سابني ودخل الحمام! انا مش فاهمه ليه جوزي بيصدني كده وكمان مش فاهمه ايه الاصوات اللي بسمعها دي! قلت لنفسي دي اكيد ست عملت لجوزي سحر وخطفته مني واللي بشوفه ده عشان تخرب حياتي وجوزي يفكرني مجنونة!..

علاقتنا بدات تسوء اكتر ويعتبر محمد مبقاش يكلمني اصلا ولا بيقعد معايا.. يجي من الشغل ويروح داخل اوضة العيال ينام معاهم والصبح يروح الشغل! ..

الوضع استمر ع كده لحد ما ف يوم كنت قاعدة انا والعيال ف حوش البيت .. العيال كانوا بيلعبو جنبي وبعدها سابوني وخرجوا الشارع وبقيت انا ف الحوش لوحدي.. وفجاة وانا قاعده سمعت صوت صرخت ست جاي من جوه البيت! اتفزعت.. الصوت ده ازاي جاي من جوه.. عيالي مش هنا يعني البيت فاضي! كنت ميته من الخوف واقفه مش قادرة اصلب طولي .. فضلت اقرا في قران لحد ما الصوت سكت وهديت.. دخلت البيت .. لما دخلت شميت ريحة حريق! حاجة كانت محروقة شامتها ف الصالة!..

من بعد اللي حصل تاني يوم رجعت علاقتي مع جوزي زي الاول واحسن.. بقى ينام ف الاوضة معايا وبقينا كويسين جدا مع بعض! طبعا استغربت ومكنتش فاهمة ليه بعد اخر موقف وصوت صريخ الست اللي سمعته وانا ف حوش البيت .. بعدها تاني يوم علاقتنا رجعت احسن من الاول! الاجابة دي جاتلي بعدها بكام يوم…

كنت مع محمد ف مشوار انا وهو وكنا راكبين العربية.. لقيته بيقولي في حاجة عايز اصرحك بيها من فترة لكن كنت منتظر الوقت المناسب.. انا قلت اكيد هو متجوز وهيصارحني بكده.. بس لقيته بيقولي فاكرة اللي كان بيحصلك من فترة.. الاصوات الغريبة لست بتصرخ اللي كنتي بتحكيلي وانا مكنتش بصدقك.. انتي كلامك صح وانا كنت مصاب بجن عاشق بسبب اني كنت ببص للمرايا كتير وانا بحلق بليل! ف يوم نمت بعد ما حلقت وشوفت بنت داخله اوضتنا وبتقولي اننا متجوزين من فترة وهي حامل كمان مني! من بعدها بقيت اشوفها كتير وكانت بتمناعني اقرب منك.. بس انا رحت لشيخ وهو عالجني! بعت جن ف اليوم اللي كنتي بره ف الحوش خوفوها وصرخو ف وش الجنيه وحرقوها! ريحة الحريق اللي شمتيه كان ريحة حريقة الجن اللي بعته الشيخ عملوها عشان يخوفو الجنيه وتخرج من البيت.. وصوت الصرخة اللي سمعتيها ده صوت الجن اللي بعته الشيخ عشان يخوفها! انا مرضتش اقولك غير لما اتعالج والجنيه دي تخرج من بيتنا!..

ودي كانت اول قصة عن الجن العاشق …

القصة التانية حصلت لبنت برضه بس هي محصلتش معاها .. حصلت لصديقتها..

البنت دي بتقول صاحبتي حكتلي ان جوزي عنده قريبه ممسوسة بجن ومحسوده! في مرة جت وباتت عندنا ليلة وتاني يوم روحت بيتها.. قريبتي جوزي دي سابت اثر من مسها بالجن ف شقتنا لان بدأ يحصلنا حاجات غريبة ! بقيت اسمع اصوات همس وصوت صريخ لستات ورجالة واطفال! ده غير الخيالات اللي كنت بشوفها ليل ونهار ف شقتنا! وفي يوم من الايام كنت نايمة ف اوضتي لوحدي لان جوزي كان بايت ف الشغل.. وبنتي نايمه ف اوضتها.. بنتي عندها خمس سنين.. المهم صحيت ع صوت ست ف اوضتي! فتحت عيني وكنت لسه ما بين النايمة والصاحية.. شفت لما فتحت عيني ست طويلة اوي وشعرها كان طويل ومجعد! انا رجعت انام تاني وقلت يمكن متهيالي خصوصا ان كنت بتفرج على فيلم رعب قبل ما انام..

نمت وصحيت تاني يوم وافتكرت الست اللي شفتها وقلت لنفسي ده كان اكيد حلم.. مركزتش ف اللي شفته .. بس جات الخدامة اللي بتنام ف اوضة بنتي وقالت لي انها امبارح بليل جيت الاوضة وبصيت ع بنتي وخرجت تاني.. وقالت اني كان شكلي غريب لابسه نفس لبسي وشعري طويل ومجعد وبشرتي كانت شاحبه! ده وصف نفس الست اللي شفتها امبارح لما صحيت ومركزتش فيها! يعني مكنتش بحلم واللي شفتو صح! اول ما جوزي رجع حكيت له كل حاجة وقررت اراجع الكاميرات واشوف اوضة بنتي .. فضلت قاعده جنب شاشة الكاميرا ومستنيه الوقت اللي قالتلي الخدامة عليه ان دخلت فيه اوضتي بنتي.. فضلت قاعدة والوقت بيقرب .. وكل ما كان يقرب كنت بخاف.. فندهت جوزي يقعد يكمل ويشوف هو لان خايفه اشوف حاجة ترعبني اكتر ما انا مرعوبة! جوزي كان عايز ينام فقعد بملل قدام الشاشة وكنت بتابعه من بعيد.. كان حاطت ايده ع خده وبيبص للشاشة بملل. فجاة لقيته رفع وشه وهو مخضوض وبيبص للشاشه بتركيز وع وشه اشد علامات الخوف! فضل باصص وراح قام عايد المشهد اللي مكنتش شايفاه كذه مره.. وبعدها قام من ع الكرسي .. قلت له لما جالي ف ايه شفت الست اللي شعرها مجعد ووشها شاحب؟! قالي لا انا شفت خيال اسود طويل طالع من الحمام وبعدها دخل اوضة بنتنا و واقف جنب سرير بنتنا شوية.. وفجاة شفت بنتنا بتترفع من ع الشرير .. واتعلقت ف الهوا شوية وراحت مهبوده ع السرير تاني !….

من بعدها فتحت القران ف كل البيت ومبقتش ابطله خالص .. وبيبان الحمامات كنت بقفلها ومسبهاش بليل.. والست دي مبقتش تيجي خالص وكل حاجة اختفت!…

القصتين دول حقيقيين ….

#محمد_مهني

#الجن_العاشق