الطلسم_الملعون
حادثة غيرت حياته وحياتى وقلبتهم لجحيم
حادثة ملناش يد فيها او علي الاقل مش قاصدينها
هربنا من عقابها القانونى
لكن اتضحلنا ان في عقاب تانى ابشع واسخن يمكن عقاب القانون قدامه رحمه ومغفرة بس العقاب التاني كله موت
انا زين درويش مشروع صحفي تحت الانشاء وبفشل في كل اختبارات الصحافة لكنى مسمي نفسي صحفي برضو اهو احسن من عاطل
سنى 26 سنة
والدتى 52 سنة ووالدى 53 سنة
اي حد هيذكر والدى هيقول الله يرحمه
وانا كمان هقول الله يرحمه
هما بيقولوها عشان بالنسبالهم مات
بس انا مش بقول يرحمه عشان مات
لا يرحمه عشان بيتمنى الموت ومش طايله
والدى هو بطل الحكاية الاول وانا البطل الثانى
درويش التهامى غباشة
محامى
قبل اشهار موته خارج انا وهو من احدى مقرات اليوم السابع
وكان في احتمال يقبلونى
خارجين مبسوطين وبنظرة الاب اللى نفسه يشوف ابنه حاجة
سرح في النظر ليا
وفي نفس الوقت كان في شاب من سنى معدى الطريق بيجرى من حاجة وبيبص وراه
العربية شالته بسرعة لدرجة انى ملحقتش اشوف حاجة
كل حاجة حصلت في ثانية او اقل
بابا استوعب وموقفش كمل وبسرعته عشان محدش ياخد النمرة
وقولنا نصيب وانها غلتطه انه بيعدى الطريق جري
وافتكرنا الموضوع خلص
في نفس اليوم بالليل حلمت ببنت قمر واقفة على صخرة بعيد ومدالى إيديها وبتندهلى لكن انا كنت متثبت مكانى ومتمسمر
وصحيت على نااار في بطنى عذاب ألم شديد كأن حد ماسك سكاكين وبيقطع فيها
قومت نورت النور اللمبة فرقعت
وصوت كلب بينبح في ودنى
جريت علي الباب فتحته وخرجت
ملقيتش حد موجود في الشقة
لكن في اثار دم من عند باب اوضة بابا
قربت وفتحت الباب لقيت في دم كتير علي السرير لكن مفيش حد
تليفونى رن فتحت لقيت ماما بتعيط وبتقولى ابوك في الانعاش جاله نزيف داخلي وحالته وحشة
لبست ونزلت ركبت العربية ومشيت ناحية المستشفى
وطول السكة مش قادر انسى منظر الحادثة ومنظر الدم اللى علي السرير
لكن فجأة لقيت في وشي البنت اللى كانت في الحلم ظهرت قدام العربية اختل توازنى وفضلت اجري بالعربية شمال ويمين
ببص جنبي لقيتها قاعدة على كرسي العربية
صرخت وكنت هتقلب بالعربيه بس لحقت نفسي ولقيتها اختفت
ولقيت الشاب اللى خبطناه ظاهر في مراية العربية لكن عينيه ووشه كأنهم محروقين وعمال يبرق وعينيه تجيب دم وانا عمال اصرخ وقفت بالعربيه لأني حسيت بوجع تانى في بطنى شديد وفي وقت ماأنا بتوجع لقيته اختفى لكن مكان ما قاعد لقيت موجود بطاقته فيها اسمه وعنوانه ”الاسم / رمضان سالم عامر الخلفاوى. العنوان / 19 شارع حسن التهامي . البساتين .القاهرة”
والوجع أختفي لما الشاب كمان أختفي أتحركت بالعربيه بسرعه علشان ألحق أبويا وصلت قدام المستشفى
نزلت وطلعت جرى على رقم الأوضة دخلت لقيت الدكاترة متجمعين وبيعملوله دفع كهربي بجهاز كده في صدره لان القلب وقف
عينيا دمعت وجسمي اترعش من الخوف ومن الاندهاش ومن انعدام الاستعاب للى بيحصل
فاق
والدكاترة قالتلنا خرجوه من المستشفى ده حصله تهتك في بطنه من جوه وتلف في الكبد ومش هيستحمل اكتر من يوم ومن رأيهم انه يموت في بيته افضل
انتوا متخيلين الكلام ده نازل عليا ازاي
فعلا اخدناه البيت وكان في نص وعيه
فضلت جنبه ودموعي بتنزل عليه وقلبي محروق وخوف ورعب من اللى جاي
نمت في حضنه
حلمت نفس الحلم بس مكانتش بتناديلي انا
نفس البنت واقفة على نفس الصخرة في مكان واسع وفاضي مادا إيديها وبتنده على والدى بس هو مكانش متمسمر وثابت مكانه لا ده اتحرك إيديه مربوطة بجنزير حديد مولع وبيتحرك ناحيتها
وقرب ووصلها وركع
وظهر اشخاص كتير اوي نفس شكلها اتجمعوا حواليه
اختفى وسطيهم ومبقاش باين
بدأوا يتفرقوا
لكن مكانش موجود وسطهم
مبقاش ليه أي وجود
انا عارف الحلم ده غرضه ايه وغرضه يوصلى ايه اكيد قصده ان بابا مات
صحيت ابص عليه وانا خايف من اللى كنت متوقعه
لكن لقيت ابشع من اللى كنت متوقعه
انا حاضن جثة الشاب اللى خبطناه واول ما فتحت عيني اختفى
ووالدى ملوش وجود
خرجت على امل وجوده برا
اول ما خرجت ماما واجهتنى بسؤال بالنسبالها عادى لكن بالنسبالى نزل عليا زي الصفعه
”ابوك عامل ايه دلوقتى”
ارد اقولها ايه
اقولها ابويا اختفى
ابويا ملوش وجود لا بروحه ولا حتى جسمه
اقولها ابويا اتسحب من حضني
انه يموت ده قدر ومكتوب وكان لازم هنواجه اللحظة دى
لكن اختفاؤه ده اللى ميستوعبهوش لا عقل ولا منطق
قفلت الباب بالمفتاح وبصيت لماما وقولتلها كويس بابا كويس ان شاء الله
وسيبتهم ونزلت واول ما نزلت بدأوا يرنوا علشان افتحلهم الباب يخشوا يطمنوا عليه
عملت التليفون صامت ودورت العربية وانا مش عارف هروح فين وهعمل ايه
افتكرت بطاقة رمضان عامر الشاب اللي خبطناه بالعربيه
طلعت البطاقة اللى موجوده معايا اصلا شئ اخر خارق للطبيعة
روحت ع العنوان اللى موجود في البطاقة
لقيت في صوان علي القد وتسجيل شغال عليه قرآن
قربت وسلمت وقعدت وشربت قهوة ومحدش سألنى انا مين وجاي ليه لكن كله قال ان الميت غالى عليا وده بسبب انى قاعد مسهم وببكي
لغاية ماجاتلى واحده ست كبيره قالتلى انت كنت بتعزه اوى كده ده انا امه ومش زعلانه عليه وفرحانه ان ربنا خلصنا من شره رفعت عيني فيها وبصيتلها وقولتلها
”ابويا هو سبب موته وسبب ان ربنا يخلصك من شره بس من الواضح ان شره ده موقفش عندك شره ده شكله كبير”
بصتلى بصة استغراب وقالتلى تعالي يابنى معايا جوا انت مكانك مش وسط ممثلين الاحزان دول تعالي
دخلت وانا عندى ذهول من كلامها لكن عندى امل ان يكون عندها حل الالغاز اللى عماله تكبر وتوسع وتبقى اغرب
دخلنا بيتهم متواضع مش بيت قيم ومش بيت فقير لا بيت عادى ومتواضع
بدأت كلام بدون مقدمات
”اكيد تعرف تحضير الجن وتحضير الارواح وتسمع عن الجنية العاشقة”
قولتلها اسمع
”ابنى عشقته جنية وعرف ده لما كان في الحمام والنور قطع ولقاها في المراية ماسكة شمعة وقربت منه وقالتله كلام غريب مش مفهوم ابنى صرخ صرخة قوية. اتلبس واصبح معشوق من جنية وملبوس من جن راح لشيخ فسرله الموضوع ان الجنية عشقته بسبب وقفته كتير قدام المرايا والتعرى كتير في الحمام رمضان فضل يروح لكل الشيوخ والدجالين يشيلوا اللى عليه معرفوش قرر يخش في سكة تانية قال بما ان كدة كدة حياته خربت يبدأ يقرأ في كتب التحضير ويحضر ويسخر وفشل وبطل لكن اللعب معاهم مش حاجة بسيطة ولا تلعب وتبطل بمزاجك اصبح شغلانة اللى حضرهم ومعهدش معاهم انهم يأذوه ويرازوه واللى كان حاجبهم عن موته العاشقه وبدأ يأذي اللى حواليه انت بقي ازاي كنت سبب موته”
بعد فترة من التتنيح لاستيعاب كلامها قولتلها مش انا ده والدى هو اللى شاله بالعربيه وهو ماشي مرووش وعمال يجري ويبص وراه والدى مكانش قصده
وحكيتلها اللى حصل كله
ردت وقالتلى ابوك مماتش
ابوك روحه اتعلقت وجسمه اترهن من العاشقة اللى بترد موت عاشيقها ومستحيل ترجعه
وبعد نقاش طويل في تبرهن على استحالة عودة والدى
ركبت العربيه ومشيت قعدت افكر اعمل ايه طب اوصل للناس اللى حصل ازاي
ماهو يا اقول ابويا قاتل عشان يستوعبوا اللى بيحصل يا لازم اتصرف
اخدت بعضي وروحت على اقرب ترب وكانت ترب البساتين اللى كنت عاوز اسأل فيها على شيخ ومحضر اسأله عن الموضوع
الساعة كانت دخلت على 7 بليل
جاتلى ابشع فكره ممكن اعملها ادارى بيها البلوة اللى حصلت على بال ما ادور على حل لو لقيت
دخلت للتربي ومش عارف فتحت معاه الموضوع ازاي انى عايز جثة تكون مدفونة قريب
وكنت خايف من رد الفعل اللى هو يا يبلغ البوليس يا يسبلى ويلعني
بكل هدوء قالى كاشك كام يا باشا
وانا بكل قذارة طلعتله 600 جنيه
باسهم وحطهم في جيبه
نورلى بالكشاف على تربة وفتحهالى وقالى انزل هنا كان في ميت هنا اتدفن اول امبارح انزل دور في الاكفان الكفن اللى تلاقيه طرى اسحبه واخلع
انا مش عارف ايه اللى بعمله وازاي قدرت اعمل اللى بعمله لكن نزلت فعلا
ريحة الموت حواليا في كل مكان
فضلت احسس بإيدي في الاكفان لغاية ما لقيت كفن فعلا طرى سحبته من ناحية رجله للباب
لكن الباب اتقفل
صرخت بصوت عالى جدا صرخة شديدة رجت التربة
حسيت بأصوات حواليا كتير
وحد بيحط ايده على كتفي
وانا زى المشلول
لقيت عين قدامي في وشي باينة
ميت فتح عينه ووقف في وشي
وصرخ في وشي بصوت تخين جدا
سمعت التربي بيقول ايه الاصوات دى اعوذ بالله وفتح الباب
خرجت وقعت علي الارض
وشد هو الجثة بكفنها وخرجها وقالى خد جثتك وامشي مش ناقصين بلاوى علي المسا
حطلي الجثة في شنطه العربيه طلعت التليفون لقيته فصل من كتر الاتصال من امى وعمي
روحت بالعربية جيبت 2 اصحابي حكيتلهم في السكة اللى حصل وهما اتكهربوا
روحت اشتريت تابوت
اتفقت مع اصحابي انهم مغسلين وان التابوت فاضي
طلعنا وشايلين التابوت فيه الجثة ورفضت اي حد يخش جوا لان اصلا مفيش حد جوا
دخلنا وقفلنا الباب اكتر من ساعة وطلعنا بالتابوت وهما زى الهبل صدقوا امى طلعت تصريح الدفن
تصريح الدفن طلعته من غير جثة
كويس ان محدش دقق
اخدنا التابوت وروحنا الترب بتاعتنا دفنا الجثة اللى المفروض انها ابويا
والموضوع خلص
بالنسبالهم
لكن بالنسبالى لسه بيبتدى
ركبت العربيه وصلتهم وروحت المدافن في البساتين اسأل التربى على شيخ ومحضر موجود هنا يدلنى على اي حل للى بيحصل
دخلت للتربي وندهت عليه وسألته
قالى الميت اللى انت اخدت جثته كان بيتعامل مع شيخ هنا قريب قبل مايتعلم التحضير
قولتله يتعلم ايه!!!! هي الجثة اللى انا اخدتها دى جثة مين؟!!
قالى جثة واحد اسمه رمضان سالم عامر الله يرحمه مات في حادثة عربية اول امبارح
دونا عن كل الجثث اللى في الترب يا يابن المعتوهه رايح تدخلنى علي مقبرة رمضان سالم اللى مرووش وكله جن وعفاريت قالى ماهو كان الصراحة مرازيني في الترب هنا قولت اوزعة
قولتله دلنى على مكان الشيخ اللى كان بيتنيل يروحله
ادانى العنوان وروحت المكان الموجود في العنوان اللى مش هقدر أقوله
عبارة عن بيت ارتفاعه عن الارض متر والباقي لتحت
نزلت 6 درجات لتحت ودخلت
قابلنى واحد وشه يقرف الكلب
اسود وعليه غضب ربنا
قالى الدخول 150 جنية مستعجل 350 جنية مستعجل جدا 600 جنيه
اديته 150 جنيه
قالى خش مفيش غيرك اصلا
دخلت
ميفرقش عن اي مشعوذ
خيال كفوف بالضوء الخفيف علي الحيطة وبخور وشكله اقرع وعينيه عبارة عن شر
اول ما اتحقق منى قالى الطالع بتاعك جامد اوى اللى عليك كتير او اللى طالبه مستحيل
قعدت وحكيتله
قالى رمضان
ده انا اللى روشته لما قالى هبطل قومت عليه شوية حلوين من عندى وظبطوه
قولتله وبعدين
قالى اللى اذاك مش الشوية الحلوين بتوعي اللى اذاك الحلوة بتاعته
؟مين الحلوة بتاعته امه!
قالى امه مين يا استاذ لا انا بتكلم ع العاشقة ”معصرة الطلسم الملعون”
قولتله انا فهمت الاولى لكن مفهمتش التانية
قالى ”بص هي اسمها كدة عشان اللى بيخلص منها لازم يقرأ 12 طلسم وفي الغالب مبيقدرش يخلص نصهم بيقرأ طلسم كل ساعتين مع الطلسم الرابع بتبدأ تحس بألم قوى في جسمك مع الطلسم الخامس بتبدأ تهلوس وتشوف حاجات غريبة ممكن تنيمك اكتر من ساعتين واللى عملته يروح مع السادس لو وصلتله بيبدأ جسمك فعليا يتشقق ويخرج منه دم مع السابع بيبدأ رئتينك يضيقوا ونفسك تاخده بصعوبه بالاضافة لكل ألام ومصاعب اللى قبلهم مع الثامن بتظهرلك مرة بشكلها الحلو وشوية بشكلها الحقيقي المرعب الشايط مع التاسع بتبدأ يضعف نظرك بشكل قاسي ولو مش حافظ الطلاسم مش هتقدر تكمل مع العاشر بتظهرلك هي ومعاها عشيرتها باشكال قذرة ومميتة مع الحداشر بيقربوا منك ويضاعفوا كل الاعراض اللى قبلها مع الطلسم الاخير بيخشوا معاك في حرب ياتنتصر وتموتها يا يتجمعوا عليك ياخدوك لعالمهم”
مع الكلمة دى بدأت حاجة تدور في دماغي قولتله هو ممكن يكون ابويا عملت في كدة عشان وصل للطلسم الاخير قالى لا ابوك عملت فيه كدة عشان قتل عشيقها
قولتله طب انا ازاي احفظ الطلسم طب مانا عشان احفظه هقرأه وعشان اقرأه هيحصلي كل اللى انت قولته ده
قالى لااا ماهو انت متحفظوش كل ساعتين طلسم انت تقرأهم ورا بعض وهما سهلين الى حد ما وتحفظهم ومش هتحس غير باعراض الطلسم الاول بس
قولتله ولو انتصرت عليهم ابويا هيرجع
قالى ابوك وناس كتيير اوى هيرجعوا للمكان اللى اتاخد منه بس اقدر اقولك انك مش هتقدر ولا هتستحمل إنك توصل للسادس حتى
قولتله انا مش هعيش بهم ابويا يا ارجعه
يا اروحله
هات الطلاسم
اخد 500 جنيه وادانى 12 ورقة فيهم رسومات غريبة علمنى اقرأهم ازاي
اتصرفت في شريطين برشام ترامادول
الترامادول:نوع من انواع المسكن الشديد حباية منه تسهرك يوما كاملا وتحملك لحمل 100 كيلوا جرام لمسافة مش 3كم وهو مجدول ولا يصرف الا بروشته من دكتور ويستخدمه الاشخاص كامنبه للسهر ولتحمل الاعمال الشاقه لكنه مضر بالعظام وخصوصا مع الكميات الكبيرة
اخدت منه 10 حبات ويمكن دى فكرة مخطرتش في دماغ حد قبلى لتحمل البلاوى اللى هشوفها
وبدأت
”الطلسم الاول: اه اه اه اه اهيا شراهيا هاهيا نماهيا ادوناي اصباؤت ال شداي شلعجص شليقوش ططكليوش مهلوشخ بهمش هميوش يشهيت شناهش مرططكليوش نافهلم نافغلا تاوت ”
قرأته
محسيتش بالم قوى كان ألم ضعيف جدا وده تقريبا بسبب المسكن
وصلت للسادس وقرأته
انا شايف جسمي فعلا بيتشقق والدم بينفر منه وبدأ المسكن يروح خصوصا ان عدى 12 ساعة اخدى للشريط
مع الطلسم السابع بدأت احس بألم السادس اكثر وبدات رئتيني يتخنقو واحس بخنقة وبدأت عيني تزغلل
واشوف نفسي واللى حصلي في المقبرة
وانا بسحب الجثة من رجليها وظهرت المعصرة جنبي والجثة قامت وبصت في وشي وكمان شوفت الجثة لما حطيتها في العربية العاشقة كانت قاعدة في ضهرى
واشوف قطة سودة رمت ببؤها البطاقة في كنبة العربية
قرأت الثامن
ظهرتلى
وشها اسود وعينيها حمرا وبتنزل دم
قربت
وصرخت وتقرب وتصرخ تقرب وتضرخ
اخدت الشريط التاني عشان الوجع الزايد حسيت جسمي بيولع وبيتحرق
اخدت 8 حبات على نفس واحد وانا اصلا بتخنق وباخد نفسي بالعافية
بدأت تظهر في الضلمة وعينيها تبقي ابشع ونظرتها مخيفة اكتر
قرأت التاسع وانا فعليا بموت والتاسع مفرقش في الاعراض لانى اصلا حافظهم
قرأت العاشر
ظهرت واقفة على الصخرة
ويتجمعوا اشكال قذرة ومقززة
انت متخيل نفسك وانت في غابة وحواليك مايقرب من 300 جن
وكل طلسم تتأثر باعراضه مع اعراض اللى قبله ساعتين لغاية ماتضيف عليهم ألم جديد
مش قادر استحمل المنظر وبشاعته
والاعداد بتزيد
مش قادر اركز
شايف والدى مربوط باحبال وبيتعذب بنار
روح معلقة وجسم في الجحيم
قرأت الحداشر
انا مش بتشقق انا بتفكك وبتفصل من بعضي
وفجأة ضلمة
حاسسهم ورايا وقدامى وجنبي
أيادى بتتحط على جسمي وكلام بيتقال بلغتهم
عيون حمرا بس اللى باينة في الضلمة
اصوات صراخ ونواح
طب وبعدين
لما يجي ميعاد الطلسم الاخير هقوله ولا لا
اقوله وياعالم بحالى ده هقدر انتصر ولا لا
ولا كفاية واقتنع ان دى النهاية اللى مش هغيرها
ابدى مصلحتى وحياتى
ولا اكمل ايا كانت النتيجة
إنت ايه رأيك لو في مكانى وبيحصلك اللى بيحصلي
هتكمل؟!!! بالنسبالي هكمل لأن دا أبويا وبدأت أقرأ
مل عاد مل عاد رح مل رح مل عاد كاح عين عين عين الطلسم الاخير نهاية المطاف بانتظارك انحنى انحنى انحنى مل عاد مل عاد مل عشيرة القرود ترملى واهدئي وعدى نهايتك بيدك لن يعد امامك سوى النهاية يا من تسمي بمعصرة الطلسم الاخير”
انا منتظر اي حاجة غير الضلمة
اي ألم جديد
او حتى قديم
كل شئ اختفى
كل وجع في جسمي اختفي
لكنى حاسس بحد مكلبش فيا وإيده ملفوفة حواليا
النور بدأ يرجع
المكان ده انا عارفه كويس
دى الغابة اللى كنت بشوفها بس بدل مانا شايف نفسي فيها بقيت فيها فعلا
المعصرة واقفة على الصخرة
والملامح الجميلة اللى كلها حلاوة و براءة مفيش
عبارة عن جن
جن واقف
شعر كثيف وعين سودا وقرون
وفي ضهرى منها مكلبشانى
يارب
ياااارب
انا افتكرتك متأخر
انا كفرت لما دخلت في سكة الجن والطلاسم والدجالين
كنت المفروض ارجعلك انت الاول
انت الاول والاخر
نجيني انا ووالدى يارب
احنا ضحايا
حتى رمضان ضحية
يارب لو ده قدرى خد روحي متسيبنيش للعذاب
متسيبنيش للخوف والرهبة والرعب والألم
يامنجى يارب
قربوا اكتر
وشرهم زاد اكتر
بحاوفرهم بينهشوا في لحمى
وجسمي بيتحرق
”اللهم انى اعوذ بك من شرهم من اذيتهم استغيث بك ربى نجنى”
دموع الألم اللى في جسمي بتزيد
ومش قادر اخد نفسي وبتخنق
”يارب يارب يارب يااارب ياااااااارب”
مت
انا مش حاسس بجسمي
لا انا حاسس باللى مكلبشنى وحاضنى من ضهرى
لكن كأن جسمي مخدل ومتبنج
لا مموتش
النور بدأ يرجع
المكان ده انا عارفه كويس
دى اوضة بابا
لفيت لقيت بابا هو اللى حاضني
فتح عين بنظرة كلها ذل بتوصفلى العذاب اللى شافه اللى اكيد ميجيش حاجة في اللي شوفته
ضميته بحضن ميتوصفش
حضنك لحد بتحبه تعبيرا عن مدى حبك ليه غير حضنك لحد بتحبه كان هيضيع منك وتعبت عشان توصل ليه
باب الاوضة اتفتح
وصرخة الفرحة والاندهاش والخوف طلعت من امى
صرخة متفهملهاش معالم
سيبته يحكيلها عن اللى حصل ونزلت الشارع
ضهرى وجسمي واجعني بشكل مميت
ركبت العربية وروحت للمشعوذ اللى ادالى الطلاسم افهم منه ايه اللى حصل وقالي
”انت عملت حاجتين جداد هما اللى نجحوك اول حاجه صبرت وابتكرت الترامدول لتحمل الألم لكن انا وصلت للطلسم الاخير معاها وكان حاميني عشائر من جنى لكن برضو منتصرتش عليهم ومقولتلكش ده عشان محبطكش وتكمل يمكن توصل وانت وصلت لكن موصلتش بقوتك ولا بقوة الطلاسم تفكيرك في ربنا واستغاثتك بيه هي اللى نهتهم هي اللى جابت أجلهم مفيش جديد في حياتنا
كل حاجة انتهت
اتعالجت من اللى عمله الترامدول في جسمي
وروحت بلغت عن التربي وعن نفسي ورجعوا جثة رمضان مكانها وخرجت بعد 6 شهور حبس
وبدأت الجرايد والصحافة تنشر معلومات عن ناس اختفت من عشرات السنين وظهرت فجأة في مكان اختفائها
واتوظفت في جريدة مش مشهوره اوي بس أنا أخترت فيها قسم ما وراء الطبيعة
هبقي صبي نادر فودة وهنشر قصص كتير وهبدأ بقصتي الطلسم الملعون وبعد كدة هبدأ في رحلة للكشف عن ماوراء الطبيعة
لكن وعد منى رحلتى تفاصيلها هتنزل ليكوا قبل الجريدة.
تمت
نلتقي ف قصه جديدة
محمد_عباس
