قصه سلطانة

من خوفي نمت في حضن امي، لحد ما طلع النهار وبدأنا الروتين اليومي، وعلى الساعه ١١، لقيت الممرضة نعمة داخله ومعاها الدكتور، اللي فهمت من كلامها معاه انها حكتله على كل اللي حصل امبارح في الليل، لما قالت له:

-والله العظيم يا دكتور وقفت، انا مش فاهمه ايه الحالة دي، مره تموت وتصحي، ومره تقف وهي حالة مرضها حضرتك اعلم بيها مننا، دي حالة منتهية وايام في الدنيا بقضيها.. طيب اقلك يا دكتور اسأل مرات ابنها، اهي كانت موجوده وشافت كل حاجة.

ردت سمية برد كالعادة غير متوقع قالت :

-انا ماشفتش حاجة، ولا خدت بالي من الكلام اللي بتقوله الممرضة.

-اتعصبت عليها نعمه، وقالت لها بغيظ:

-اه يا ولية يا لئيمة، بقى ماخدتيش بالك من حماتك وهي واقفه، خلاص خلاص اسأل مدام منى يادكتور، ما هي التانية كانت موجودة وشافت كل حاجة.

وقت ما كانت الممرضة بتتكلم، لاحظت ان سمية بتبص لي، فهمت من نظراتها تحذير بعدم الكلام واني اسكت ماقلش اي حاجة من اللي حصلت، وده اللي حصل.. لما الدكتور سألني كان ردي “ماعرفش حاجة”.. وكأن لساني اتلجم بالنطق باللي شوفته، ولما لقيت الدكتور اسألته زادت ، فقولت اي كلام خطر على بالي:

-يمكن الحجة سلطانة كانت مسنوده وهي واقفة، او يمكن الممرضة كان بيتهيألها انها واقفة.

كان لازم اقول كده عشان اطلع من المطب ده بأي شكل، ما يمكن تحذيرات سمية تكون في محلها، والست دي تكون فعلا مش طبيعيه ولا ملبوسة، والبس انا الليلة وبدل ما اطلع بأمي بخير من هنا، اطلع على سراية المجانين، فامكنش قصادي حل غير السكوت ومانطقش باللي شوفته، وطبعا لما كدبنا كلام الممرضة، الدكتور اخد نفسه وخرج من الاوضه ومعاه الممرضة، وفضلت انا وسمية وسلطانة.. بصت لي سمية وقالت:

-جدعه انك قولتي كده، وياريت تنسي اللي حصل خالص.

-كنت لسه هرد عليها، عشان احكيلها اللي حصل امبارح في الليل، سمعنا صوت سلطانة وهي بتزعق :

-انتي يابت.

-جريت ناحيتها سمية، كملت سلطانة كلامها:

-انتي مش حذرتيها انها متتكلمش.. بس اهي نطقت، وكل واحد مش بيسمع الكلام بياخد نصيبه واللي يستحقه.

-انا سمعت الكلام ده منها، اتكلمت مع نفسي” القصه مش قصة احساس ولا غيره، لا.. الموضوع كده فيه إن ومش طبيعي ابدا”..

قربت مني سمية وسألتني :

-بقلك ايه يامني، هو انتي اللي كنتي بتقري قرأن في الأوضة؟.

فقولت لها :اه انا اللي كنت بقرا قرآن، ردت عليا وقالت :

-طيب الله يخليكي متكرريهاش تاني، طول مااحنا معاكي في الاوضة، عشان ماتأذيش نفسك وتأذي المستشفي كلها، وياريت لو سمحتي تسمعي كلامي بدون حتي ما تسألي عن السبب اوحتي اي اسئلة تخطر على بالك لاني مش هقدر اجاوبك، ماتصدقيش نوم سلطانة لو هي نايمة هم مش نايمين، سامعين كل حاجة.

صراحة كلامها قبض قلبي وخوفني، فقولت لها “حاضر ، مش هقرا اي حاجة”.. و مشيت من قدامي وانا كنت اخدت قرار اني لازم اسيب الاوضة دي نهائي، واتنقل لأوضة غيرها انا وامي وبسرعة، فروحت على مكتب مشرف الأدوار ، اللي في ايده ترتيب المرضى في غرف المستشفي، ودار بينا حوار مطلعتش منه بأي نتيجة، كان تضييع وقت على الفاضي بدأت معاه الكلام وقلت له :

-لو سمحت انا عاوزه انقل لأوضة تانيه، لان الاوضة دي مش مرتاحين فيها.

رد عليا وقال:

-للأسف ما ينفعش يامدام النقل نهائي.

-ليه بقي ده من حقي، واي مصاريف مطلوبة هندفعها.

-القصة مش قصة فلوس، لو تاخدي بالك انتوا حجزتوا سرير بالعافية واكيد حضرتك عارفة الاسباب، وهي نفس الاسباب اللي تخلي نقلكم صعب، المستشفى زي ما انتي شايفه اكتر من نصها مقفول عزل صحي بسبب كورونا، يعني كل واحد لقي سرير يكلبش فيه وكل واحد عارف مكانه، حضرتك احنا في عز الأزمة ، مستحيل حد يتنقل من مكان لمكان، اتحملي لحد بقي ما ربنا يأذن بالشفا، وتخرجي بوالدتك علي خير، لان ماعنديش حل اقدر اساعدك بيه.

-طيب اقلك بلاش احنا، انقل اللي معانا في الاوضة.

-ياستي والله انا بتكلم عربي مابقولش كلام مايتفهمش، مستحيل نقل اي حد من مكانه، يعني الكلام ينطبق عليكم وعلى غيركم، وضحت الرؤيا ولا اعيد من الاول، حاجة اخيرة عشان مانصدعش بعض بكلام ملوش داعي، لو فكرتي تاخدي المريضة وتخرجي، انسي انك ترجعي تاني، لان مكانكم حد تاني هياخده، ١٠٠مريض مستني سرير واحد يفضي، ف وحياة الغاليين قضي ايامك على خير، وارضي باللي انتي فيه، تمام يامدام ولا فيه حاجة تاني؟

-لا خلاص لا تاني ولا تالت فهمت، الامر لصاحب الامر، عشان امي اتحمل الغلب كله.

ورجعت عشان اطمن على امي، وقت ما كنت راجعة سمعت هيصة ودوشة جامدة، والممرضين بيجروا ناحية الدور اللي تحتينا، فمسكت واحده من الممرضات من ايدها، وسألتها “خير فيه ايه ايه اللي حصل؟”.. قالت :

-كنا قاعدين في الاوضه، وسمعنا صوت صراخ جامد، راحت واحده مننا تشوف في ايه، لقيت زميلتنا (نعمة) بتقع من على السلم، وبعيد عنك مش بتتحرك خالص، كلمنا الاسعاف تيجي تاخدها مستشفي العظام، عشان يلحقوا يسعفوها ويعملولها اشعات ليكون عندها كسور شديدة.

الوقت ده كانت في حد واقف ومراقب كل الحوار اللي داير بيني وبين الممرضة، سمية اللي اول ما نزلت الممرضه الدور التاني، جت ناحيتي وقالت لي وهي بتهمس :

-ايه مش فاكرة نعمة، انا عملت اللي عليا وحذرتها بس هي ماسمعتش كلامي، ربنا يعديها على خير، وتكون اخر اللي هيتأذوا هنا.

-سبتني ومشت بعد ما قالت الكلمتين اللي شقلبوا حالي، اكتر ما هومتشقلب، الخوف مسك فيا اكتر من الاول، مابقتش عارفة اخاف على نفسي، ولا اخاف علي٦ امي، ولا حتي على الناس اللي ماعرفهمش وبيتعالجوا جوه المستشفى.

طول الليل كنت بحاول انام، بس الكوابيس كانت مستخسرة فيا ساعتين النوم اللي بنامهم، كوابيس كتير وياريت متصلين يتفهموا، كل حلم كان غير التاني كأنهم عاملين ماراثون للرعب، بس الصلة الوحيدة المشتركة بينهم، اني كل ما كنت بحاول اخرج من المستشفي، بخرج علي مقابر عيلتنا وبشوف امي وهي لابسة جلابية بيضا، وماشية وسط المقابر، وبشوف سلطانة خارجة من باب تاني للمستشفى، بس اعوذ بالله لابسة اسود، وبتزحف على ايدها ورجلها، والاتنين كانوا من كتر كحتها في الارض، بيجيبوا دم لدرجة ان جلابيتها غرقانه مش عارفه ده دم، ولا مايه ولا ايه بالظبط وصحيت على صوتها وهي بتزعقلي (اسمعي الكلام ومترغيش كتير مع حد)،بس بقوم وكأني كنت بجري اميال ونفسي مقطوع من الجري، وفي نفس الوقت قلبي مقبوض على امي خفت لتفارقني.

بعد ما صحيت بربع ساعة جه جوزي يطمن علينا ، اليوم ده كان يوم خميس، وأخر الاسبوع كان بييجي جوزي ياخدني، ارتاح شويه في البيت، وتيجي واحدة من اخواتي البنات يقعدوا اليومين دول مع امي على ما ارجعلهم، اتضايق جوزي اول ما شافني وشي تعبان ودبلان كأني بقالي سنه مانمتش، وسألني ايه السبب اللي شايفه على وشي، وكلم اختي (اسماء) عشان تعجل وتيجي وفهمها اني تعبانه، اختي ماخدتش وقت وجت على طول، سبناها مع امي وروحت انا وجوزي البيت، بعد ما روحنا طول الوقت وانا قاعده مع جوزي، ساكتة وفي ملكوت تاني خالص،

لاحظ جوزي وفوقني من سرحاني وقال :

-مالك يامني سرحانة في ايه وساكتة ليه؟

-بصتله وضحكت، وانا متردده احكيله اللي حصلي في المستشفى، ولا اسكت ما هو انا كنت خايفه عليه، بس حسيت ان فيه حمل تقيل عليا، ولازم حد يشاركني فيه، وماكنش فيه اقرب ليا من جوزي، فاتشجعت وقلت له كل حاجه، كل حاجه حكيتها من اول دخول الست دي الاوضة لحد الكابوس اللي شفته، بصلي وهو بيبتسم وقال :

-ايه اللي بتقوليه ده يامني؟ ياحبيبتي ده اكيد مجرد صدف مش اكتر، والست دي كمان من شدة مرضها بتخطرف

ربنا يشفي كل مريض، ماتحطيش في بالك الكلام ده، وحاولي تهدي اعصابك وتنامي.

كنت بحاول انام و اعوض الايام اللي فاتت كلها من ضغط الاعصاب والارهاق النفسي اللي اتعرضتله، بس مش لازم كل حاجه بنتمناها بنطولها وخصوصا راحة البال، بمجرد ما عيني غمضت، شفت في الحلم (سلطانة) واقفة على باب المستشفى، وشكلها مرعب ومخيف عليه غضب ربنا، وبنفس عيونها الحادة صرخت في وشي وقالت لي :

“مش قلتلك متقليش لحد”.. وراحت سحباني جوه المستشفي وقعت على وشي، قمت مفزوعه وبصرخ من الوجع اللي حسيت بيه لما حدفتني، وصحي جوزي علي صراخي وحاول يهديني.. حكتله على الكابوس، وكان مصمم على رأيه اني لازم اشيل الست دي من دماغي، وبشوفها كتير بسبب اني مركزه تفكيري عليها وعلى اي حاجه بتحصله..

صراحة اقتنعت شوية بكلامه وقلت اه فعلا ليه لأ، انا لازم ابطل اشغل نفسي بيها شربت كوباية ميه، ورجعت كملت نومي، وبعد ما فوقت خلصت كل اللي ورايا ورجعت المستشفى، اخواتي كلهم كانوا موجودين سلمت عليهم، وسلمت على اسماء كانت ايدها متلجة ووشها مخطوف، فسألتها مالك من يوم تعبانه؟، ردت عليا وقالت :

-اسكتي يامنى ، قضيت امبارح ليلة سودة بعيد عنك، الست اللي نايمة دي مش عارفه مالها، قامت من النوم في نص الليل وتحسي انها داخلة مسابقة في تغيير الاصوات، مره تتكلم بصوتها وتقول (سامحوني)، وزي ما يكون حد بيرد عليها بس بصوت مخيف وخشن صوت تاني خالص غير صوتها انا متأكدة وبيقول (اسكتي واخرسي يا سلطانه)، وصوت تالت كأنه بيهددها ويقولها (بس يا سلطانة)، وهي تعييط وترجع لصوتها وتقول (سبوني امشي)، يابنتي كأنها كانت بتكلم ٣٠واحد في نفس الوقت، ومرة واحدة بقت تطلع صوت زي الشخير، او صوت زي صوت الدبيحة وهم بينحروا رقبتها، وجت الممرضة علي صوتها وندهت للدكتور، كشف عليها وقال واضح ان دي (سكرات الموت)، جسمي قشعر يامنى وعيوني دمعت من الكلام، والغريب ان بنتها ولا ماعرفش مين دي اللي كانت معاها ، مفيش اي تأثير عليها ولا فيه حزن على وشها، دي كانت بتبص كأنها مستنية لحظة خروج روحها اه والله يا منى كأنها مستنياها تموت، ودقايق وجت واحدة غيرها شكلها اختها اتكلموا مع بعض، بس ماسمعتش حاجة من اللي قالوه، المهم قعدت الست دي وروحت التانيه.

– ماتشغليش بالك وقومي روحي لعيالك، ورجعت انا لقضايا، وطول الليل وسلطانة تنازع وتطلع في الروح، بأصوات ربنا ما يحكم على حد يسمعها، وانا قاعدة مراقباها ومراقبة نفسها اللي كان بيخرج بالعافية، وصدرها اللي كان طالع ونازل بصعوبة، لا المنظر صعب والاحساس اصعب، قلبي كان هيقف لما سلطانة شهقت شهقة طويلة، وفي نفس اللحظه سمعنا اصوات صراخ من بره الاوضة، وجالنا خبر سبب الأصوات، ان فيه شاب مريض في الاوضه اللي جنبنا اتوفي، رجعت ببص على سلطانة لقيتها كويسه ونفسها مرتاح، جالها الدكتور وكانت فايقه وحالتها مستقره، بصت له وقالت:

– انا كويسه محدش يقرب مني.

وبعد شويه قعدت وندهت على سمية وقالت لها :

-بت يا سمية فيه حد من الجماعة جم؟

-ايوه ياعمتي سلطانة، جم وكلموني وأذوا الممرضه

-تعبت امتى بقي ربنا ياخدني، وارتاح من العذاب دي، هاتيلي يا سمية شوية ميه ابل ريقي.

ومرة واحده بقت تكلم حد مش شايفينه، وتقول (خلاص خلاص هسكت)،والحال اللي كانت فيه استمر معاها، كل يوم في الليل يشد عليها التعب والألم وكل يوم بيكون اسوأ من اللي قبله، وايام كانت تيجي في نص الليل، وتقعد زي التمثال وتطلب اكل كتير مايتنسبش مع حالتها، وبرضه بتتكلم مع حد مش شيفاه، والمصيبة التانيه اللي معاها مرة تقولها امرك يا ستي، ومرة تانية امرك يا سيدي، لا خلاص انا بقيت متأكدة ان الست دي ملبوسة، ولما قلت كده في بالي والله العظيم اتكلمت وكأنها بترد عليا وقالت:(ايوه ياارب تكوني فهمتي، اسكتي بقي يا حرباية).

انا حرباية! اللهم اخذيك يا شيطان شكلي فعلا وصلت لمرحلة الجنون، انا بقيت بكلم..

طول المدة دي ورتني الويل، الولية دي كان بييجي علينا وقت بتقول نشرة أذاعيه.. اه والله نشرة وهاتك بقي (سامحني يا فلان ويا فلان ويا علان) بتنده على اسامي لبني آدمين ومفيش غير سامحوني، والاقي حالة الانفصام بدات بعد كلمة سامحوني، صوت مختلف نهاائي عن صوتها يطلع ويزعق ويقول (اسكتي يا سلطانه) تصدق والله بقيت زي الجبلة، عارف الواحد اللي بيشغل كاسيت على نفس القناة كل يوم، اهو انا كنت وصلت للمرحلة دي مع سلطانة جسمي وعقلي اتعودوا مابقاس فارق معايا، بس الموقف اللي مكنش له تفسير عندي.. النوبة اللي بتجيلها اشبه بسكرات الموت، بنفس الوصف اللي وصفته لحالاتها قبل كده في كلامي، واخر ما تخلص منازعة الموت واقول خلاص دي بطلع في الروح ، الاقي الصراخ جاي من بره، وحد يموت من العيانين في المستشفى، وبعد ما نسمع الخبر تقوم هي ولا كأن كان فيها حاجه.. واختي حرمت تيجي تبات تاني مع امي، من بعد اللي جرالها وشافته في المستشفى على ايد سلطانة، لدرجة انها بقت تتهرب مني وتطلع بأي حجة عشان متجيش تبات مكاني ولو حتى يوم، وكنت مع تعبي ده كله كان من المستحيل اخرج امي قبل ما تكمل علاجها، اللي كانت دايما بتصبرني وتهون عليا تعبي.

وفضلت على الحال ده فترة، لحد ما في يوم كانت برضه عماله تقول (سامحوني، سامحوني)، فسحبت مرات ابنها مين ايدها وقولت لها “هم مين اللي بتنده عليهم حماتك؟”.. قالت ;

-كتير، اللي ظلمتهم كتير يامني، واحنا منهم.

-هم مين طيب فهميني؟

-للأسف ماقدرش اقول حاجة، مش مسموح لي اتكلم.

تاني يوم دخلت سلطانة في غيبوبة كاملة، وحتي وهي في الغيبوبة بقت تصرخ بصوت عالي، والدكاترة بقوا محتارين في امرها، ومش عارفين يسكتوها ازاي عشان القلق اللي عملاه للعيانين، وهم مش بأيدهم حاجه لانها في غيبوبة اصلا، هيسكتوها ازاي؟

وفضلت على الوضع ده٤ ايام، تالت يوم بقت تتنفس وكأن فيه صخره على صدرها، فقلت اقرا قرأن ماحدش عارف الخير فين، يمكن ربنا يسهلها، واول ما بدأت اقرا لقيتها بتعمل صوت مرعب وتزوم بصوت مخيف وهي بتجز على اسنانها، اتكلمت مرات ابنها :

-اسكتي يا منى اسكتي، كفاية قراية خلي اللي يجرالها يجرالها ده ذنب وبيخلص.

حسيت ان سلطانه خلاص بتموت، فجه في بالي اخد من مرات ابنها نمرة تليفونها بسرعة بحجة اني اطمن عليها، واقدر اتواصل معاها، وهي ماعترضتش.. رابع يوم لحاله الغيبوبة اللي فيها سلطانة،كانت الساعة تقريبا ١٢ ونص في الليل، خرجت منها شهقة قوية، مش هبالغ لو قلت ان الاوض اللي حوالينا سمعوها، ومن بعدها قطعت النفس، ونبضها وقف، وبرغم كل ده الدكاترة مكنوش واثقين في موتها، ماهي ليها سبقة موت قبل كده، فأخدوها وحطوها على اجهزة الانعاش كام ساعة، ومن بعدها اعلنوا وفاة المريضة سلطانة وكلموا اهلها عشان ييجوا يستلموا جثتها.

قلت خلاص قصة سلطانه واخيرا هرتاح، بس واضح انها كانت مجرد امنيه في خيالي، تاني يوم بعد وفاتها صحتني امي في الليل، عشان اجبلها ماية ساقعه وفعلا طلعت اجبلها، دخلت الاوضه اتلمحت بحد نايم علي سرير سلطانه، او هي نفسها سلطانة، الكوباية وقعت من ايدي، وجريت بسرعة عشان انور لمبة الاوضة، وبصيت ورايا السرير فاضي مافيهوش حد، استعذت بالله من الشيطان الرجيم، وروحت جبت مايه لأمي ورجعت عشان انام، وانا نايمة سامعة حد بيهمس في ودني وبيقولي (بصي جنبك) بصيت لقيت سلطانة قاعدة بنفس هيئتها وشكلها، وبتبص عليا وانا نايمة، ومقدرتش يومها انام غير والكهربا منورة، وبرغم ان جالنا مرافق في الاوضة، اهو زي ونس ليا بس برضه كنت بشوف سلطانه دايما قاعده على سريرها، او بتقف وتمشي ناحية الحمام، وبعد اسبوع من الرعب ده، امي شد عليها التعب ماكملتش ساعات وربنا استلم أمانته، نزلوها اوضة الغسل، ودخلت معاها والمغسلة كانت مرتاحة ومبسوطه وهي بتغسل امي، وعماله تقول (الله يرحمك يا حاجة، ما شاء الله عليكي) كنت مرتاحة لكلامها عن امي بالشكل ده، فقلت لها، هو الميت بيتحسد يا خالتي ردت وقالت :

-اه امال ايه يابنتي، وامك طلتها ووشها مفيش احلي من كده، الله يحسن خواتيمنا، انتي عارفه احنا من اسبوع غسلنا واحده يااارب سلم من طلتها، قاطعت كلامها وبدون ما افكر ثانية قولت لها:

-اكيد سلطانة مش كده؟

اكدت كلامي، بس طبعا بسؤال بتتعجب في (عرفت منين؟، واعرف منين سلطانة)، بدون ما احكيلها تفاصيل اللي حصل مع سلطانة الفترة اللي فاتت، اكتفيت بالرد عليها بأن سلطانة كانت معانا في نفس الاوضة، فرجعت للي كانت بتعمله وقالت :

-اه ساعتين يابنتي، ساعتين عذبتنا ووريتنا المر سلطانة بنت محاسن.

حمدت ربنا انها وقفت بكلامها لحد هنا، لأن ماكنش عندي استعداد اسمع كلام عن اي حد، وفاة امي كان قاسم قلبي ١٠٠ حته، وموقف عقلي عند اخر لحظه اتكلمت فيها معاها قبل ما تموت.. عدت ايام العزا، ورجعت مع جوزي على بيتي، اللي كان بيهون عليا وفاة امي علي قد ما بيقدر، لدرجة انه كان بيحاول يضحكني ويفكرني بذكريات سلطانة الملبوسة، وقتها افتكرت نمرة تليفون سمية اللي اخدتها منها، ومن غير تردد جبت تليفوني واتصلت عليها، ودار بينا كلام لا يمكن كان يخطرلي على بالي، اول ما كلمتها سلمت عليها وفكرتها بنفسي وكان ردها عليا :

-انا عارفه انتي متصلة ليه؟ مش حوار سلامات انتي عاوزة تعرفي ايه اللي كان بيحصل مع سلطانة.

رديت عليها;

– اه مين سلطانة؟.. وخصوصا اني لسه بشوفها في أحلامي.

– أحلامك!.. ده انتي غلبانة اوي يا بنتي، احنا بنشوفها في كل حتة في البيت، كأنها قدر واتكتب علينا هيفضل ملازمنا باقي عمرنا، مش هترتاح غير لما تاخدنا معاها القبر، بس عارفة انتي تستاهلي اللي يجرالك، يا ما حذرتك ونبهتك ماتركزيش مع سلطانة، بس انتي ماسمعتيش الكلام اشربي بقى ، ومش النهارده ولا بكره لا، ده باقي عمرك يا منى

رديت عليها وانا مرعوبة من كلامها;

-تقصدي ايه بكلامك ده؟

-اقصد انك وقعتي في حجر (سلطانة بنت محاسن دجالة بنت دجالة)، سلطانة اللي رضعت من امها الكره، وربتها علي الحقد، واتعلمت منها ازاي تعمل المستحيل عشان محدش يعصيلها كلمة، سلطانة (حماتي، ومرات عمي، ومرات ابويا)، سلطانة اللي حفرت بضوافرها عشان تملك كل حاجة بتسخير عشيرة مردة من الجن، يعملوا كل حاجة، (تقتل، تيتم، ترمل، تهدم بيوت)، كل خراب حل على ايدها، وبيتنا كان من البيوت اللي خربتها، يوم ما حطت عينها على عمي واتجوزته، خلف منها ولدين (كامل، وعلي)، ولاد عمنا واجوازانا انا واختي، اللي كانت مبهدلاهم معاها في القرف اللي كانت بتعمله، مكنش بيهمها انها تسحب واحد من عيالها، عشان تفتح المندل لفلان، او تاخد من دمهم عشان تستخدمه في عمل قذر لعلان، المهم عندها تفضل علي طول (سلطانة)، حتى لو التمن ولادها كان شعارها (ايه يعني هيجرالهم ايه، لو ماتوا اجيب غيرهم عشرة)، كان الكل تحت طوعها، عمي وعيالها حتى ابويا ماكنش يقدر يفتح عينه فيها، مش عارفة دي بسبب خوفه علينا ولا خوف منها، ماسبتش مخلوق غير لما أذته، سلطانة كانت زي الوباء اللي بيزحف على كل بيت، مش بتسيبه غير لما يهلك بالجنون او الموت..

والموت طال عمي، عمي يامني في يوم اسود فكر يقف قصادها، ويمنعها من انها تقرب لولاده، الصبح ماطلعش عليه، صحينا علي خبر موته وهو كان بصحته مافيهوش اي مرض، وتفتكري تسكت زحفت بسمها على بيتنا، خطفت امي من ابويا بالسحر والاعمال واتجوزته، ويوم ما امي اعترضت جننتها كانت تفضل تصرخ بدون اسباب، وتقطع في شعرها وتاكله، كانت بتشوف حاجات في البيت احنا مش شايفينها، امي اللي كان الكل بيحلف بعقلها، رماها ابويا في مستشفى المجانين ومنعنا من زيارتها، فضلت تتعذب هناك ٣سنين لحد ما ربنا خدها عنده، وماسبتناش في حالنا انا واختي، ورتنا الويل.. كانت تمسك ايد اختي علية عشان تاخدها المقابر في نص الليل، وانا مكنش بيهون عليا اختي الصغيرة، كنت اقلها سيبي علية وهروح انا مكانها، اطبطب علي٦ اختي وادخلها الاوضة وانيمها، واطلع انا معاها للأماكن اللي كانت بتخطف قلبي من الرعب، شوفت في سن صغير علي ايدها اللي محدش شافه، كل حاجه من جن لأشباح، ماسبتش حاجة تنشف الدم اللي لما ورتهالي، وفي سن صغير يمكن ماكناش كملنا ١٦ سنة جوزتنا لاولادها، حكمت ان كل واحد ياخد اوضة في البيت ويقعد فيها، عشان تربطنا اكتر واكتر ومانبعدش عن عينها، حمدنا ربنا ان عيالها مش زيها، كانوا معترضين على كل افعالها، بس ولا واحد يقدر يتكلم، كلمتها تمشي على الصغير قبل الكبير، لو ماكنش بالرضا يبقي بالغصب..

سلطانة مكنتش تعرف يعني ايه ربنا، ولا كان يتذكر اسم ربنا في البيت، ولا آيه قرآنية تتقال، ولو حد فينا بالغلط قرا، ربنا ما يوريكي اللي، كان بيحصل البيت كله يتقلب، ومنعت كل اللي في البيت من كل حاجه تربطنا بالدين حتى في عز صيام رمضان، تلاقي سلطانة فاطرة وبتاكل، واحنا نكدب عليها ونقولها فاطرين واحنا نبقي صايمين، قصصها كتيريا مني لو قعدت سنة احكي مش هجبلها اخر، فاكرة يوم غسلها انا الوحيدة اللي دخلت معاها، محدش وافق من الممرضات يدخل معانا، المغسلة اللي بتغسلها كانت هتتجنن، كانت كل ما تكب عليها المايه جسمها يطلع دخان، ويسيب على جلدها علامات حروق، لدرجة ان الست غيرت المايه اكتر من مرة كانت بتشك انها سخنه، الولية غلبانه ماتعرفش انها بتغسل شيطانه من بنات ابليس، وانا واقفه ومش بنطق هقولها ايه، والست تكب المية تنزل سودا اسود من الهباب.. ده غير البهدلة اللي شفناها كل ما نقول خلصنا، تعمل حمام (بول وبراز وقرف) ده غير الدم اللي كان بيطلع من تحت ضوافرها، وكله ولا ريحة العفونة، طالع منها ريحة جيفة ميته بقالها اسبوع مش واحدة ميته من ساعه، مكنش فيه حاجه نافعه لنضافتها، وكنا خلاص تعبنا والمغسلة زهقت اكتر من ساعتين نغسلها ومفيش فايدة، لفتها المغسلة في كفنها من غير غسل وقالت ;

-خلاص يابنتي الامر بأيد ربنا وحده، هو عاوزها تروحله كده زي ما عاشت كده، الله اعلم عملت ايه في دنيتها سلطانة بنت حوا وآدم.

ورفضت المغسلة تاخد مننا فلوس، قالت لنا نطلعها علي روحها يمكن ربنا يرحمها برحمته..

على فكرة احنا قفلنا البيت اللي كنا عايشين فيه معاها، سبناها بكل حاجة جواه حتي هدومنا سبناها، مستحيل حد كان يرضي يشتريه، عزلنا في بيت جديد وبنحاول نبدأ حياة جديده، بذكر ربنا اللي مش بيتقطع من البيت، مع انها مش سيبانا برضه، بس احنا متحصنين بربنا أقوى من اي شئ، وبسبب كل اللي حكتهولك، كنت خايفه اقلك مين هي سلطانة وهي لسه عايشه، كنت خايفة لتتأذي منها، اللي زي دي ربنا مش هيسامحها، بس ادعيلها ربنا غفور رحيم،

قفلت مع سمية المكالمة، وانا مش مصدقه اللي سمعته، معقوله فيه ناس كده، بيشركوا بالله عشان طمع وجشع الدنيا، ليه وعشان ايه دول هيخسروا اخرتهم قبل دنيتهم، وليومنا ده بشوف سلطانة دايما في أحلامي بشكلها المرعب، واغلب الاحلام بتكون يا اما داخله الحمام يااما خارجه منه، بس سلاحي الوحيد ايماني بربنا ان مفيش حاجه في الدنيا تقدر تأذيني الا بأمره..