الدنيا دي مليانة غموض وأسرار… اسئلة كتير ملهاش اجابات ولكن احنا دايما عندنا الفضول لكشف المجهول ومعرفة الحقيقه
دي طبيعة عندنا ومش هتتغير أبداً
عاوزين نعرف كل حاجة حتي ولو كانت النتيجة كارثية
…
لا أنا أكيد بحلم.. اه اصل ده مستحيل يكون حقيقة حطوا نفسكوا مكاني
عارف يعني اي تكون شغال في مطار وتشوف اسم اخوك في قائمة الانتظار المشكلة مش في كده
المشكلة ان اخوك ده ميت من 5 سنين!!
هتقولوا تشابه أسماء.. طيب ولما الطايرة توصل ويبقي واقف قدامك بشحمه ولحمه هيكون اي رد فعلك لو انت مكاني ولا هتقولي يخلق من الشبه اربعين؟!!
…
اه قتلتهم وخلاص بسجل، قتلت اخر ضحية ازاي؟.. الانتقام اللي في قلبي يخليني اقتلهم مليون مرة
خلصت المذكرات ودلوقتي انا سامع صوت سرينة الشرطة
أنا مش هقاوم لا.. الباب اتكسر حرفيا ودخلوا عليا علي أساس اني هحاول اهرب مسكوني
اتقبض عليا بس انا مش زعلان أنا فرحان أنا اخدت حقي
…
أنا في القفص بسمع كلام وكيل النيابة في المحكمة وهو بيقول
_ ان هذا المتهم ارتكب جرائم شنيعة دون ان يفكر في العواقب فقد قام بقتل 7 أشخاص ليس لهم اي ذنب
_ مين قالك ان ملهمش ذنب؟ مييين.. الناس دي اخدت مني اقرب ناس ليا حرمتني منهم ودمروا حياتي
_ لا يوجد مبرر لقتلهم.. أنا أطالب بتوقيع اقصي عقوبة على المتهم وهي الاعدام شنقا ليكون عبرة لكل قاتل
…
القاضي قال الحكم بعد المدولة ورجع بعدها بعشر دقايق وقال
بعد الاطلاع على الدعوة وسماع شهادة الشهود حكمت المحكمة وباجماع الاراء على المتهم وائل محمد جمعة باحالة أوراقه إلى فضيلة المفتي
مش مستغرب الحكم.. نديت علي اخويا حسن وقولتله
_ خلي بالك من نفسك ومن بابا وماما أنت قد المسؤولية انا عارف ده
_ أنت ليه عملت كده.. ليه؟
_ خد أقري المذكرات دي وانت هتفهم كل حاجة
…
أنا حسن هفتح المذكرات وهقري علي اني وائل عشان تفهموا اللي حصل بالظبط
أسمي وائل مش من هواة كتابة المذكرات نهائي لكن اللي حصل معايا.. لازم يتحكي
أنا كنت عايش مع والدي ووالدتي واخويا حسن حياة سعيدة جداً.. أنا خريج كلية هندسة وكنت متفوق في دراستي وعشان الحالة المادية كويسة إلي حدا ما.. قررت أفتح شركة خاصة بيا.. وفعلا عملت ده
وفي ظرف سنة كانت شركة ناجحة وليها أسمها وفي الشركة قابلت هدي.. كانت بنت جميلة جداً تقدروا تقولوا ان ده الحب اللي من أول نظرة
فضلت ألمحلها فترة لحد ما قررت اخد خطوة رسمي واتقدمتلها.. وافقوا عليا وفي وقت صغير كنا متجوزين
لكن بعد الجواز كل الحب من ناحيتها كان بيقل بالتدريج.. بطلت تهتم بنفسها وبيا وبالبيت كانت مهملة جداً
..
وفي يوم اتأخرت في الشغل شوية.. رجعت ملقتهاش في الشقة.. بصيت في الساعة كانت 12 بليل.. اتصلت بأهلها .. محدش بيرد عليا
قررت اني هنزل ادور عليها.. وروحت اول مكان فكرت فيه بيت اهلها
وياريتني ما روحت كانوا كلهم قاعدين في صالة البيت وقاعد معاهم واحد وحاطط ايده علي دماغ مراتي وبيقول كلام غريب.. عامل زي الطلاسم والتعاويذ
صرخت فيهم أنتوا بتعملوا أي؟!!
_ يبني اهدي مراتك عليها جن وأحنا بنحاول نعالجها
_ جن اي وقرف اي؟ اي الجهل ده قومي معايا يلا نرجع بيتنا
_ لا مش هرجع معاك انا هسمع كلام اهلي.. وبعدين ده ابن عمي وببعالجني
_ ابن عمك!!
….
بعد ما عرفت هما بيعملوا اي.. قررت واخدت القرار وقولتلها
_ أنتي طالق يا هدي.. خليكي مع اهلك
ومشيت.. خرجت بره البيت واخدت عربيتي عشان ارجع بيتي .. رجعت وانا مش مصدق الحالة اللي وصلتلها مراتي.. حاجة غريبة وازاي انا كنت مخدوع في الناس دي كده
حاولت انسي لكن النسيان صعب.. صعب جداً
..
3شهور مروا بسرعة.. كنت بحاول اتأقلم على حياتي الجديدة وانسي هدي.. وفي الوقت ده قابلت سارة
كانت بنت جميلة جداً
ساكنة في شارع جنب عيلتي.. كنت مشدودلها جداً
بس كنت خايف من تكرار التجربة.. لكن والدي ووالدتي نصحوني اني ادي لنفسي فرصة تانية
وفعلا روحت واتقدمت لسارة
وافقت عليا.. كنت مبسوط جداً بصراحة كانت بنت جميلة مختلفة في كل حاجة وده اللي خلاني اتعلق بيها اكتر
..
لكن يوم الفرح حصلت حاجة.. كنت انا وسارة في الكوشة والناس بتبارك لينا على الجوازة لحد لما لقيت واحدة مدت ايديها وقالت
_ الف مبروك
كانت هيا.. ايوة هدي وعلي وشها ابتسامة خبيثة.. ونزلت من علي الكوشة وانا هاين عليا اقوم اطردها بره الفرح
خلص الفرح وكانت دي بداية المعاناة
أول ما دخلنا الشقة حسيت اني مش مرتاح مخنوق حسيت في المكان بطاقة سلبية
دخلنا الاوضه وسارة طلبت انها عاوزة تاخد دش ودخلت الحمام وفضلت مستنيها تخلص
عشان بعد ربع ساعة.. تخرج من الحمام بس دي مش سارة.. دي واحدة تاني وشها دميم بشع
جسمها مشوه
..
صرخت وانا بحط ايديا علي وشي وبقول.. اعوذ بالله من الشيطان الرجيم.. اعوذ بالله من الشيطان الرجيم
لقيت سارة بتقولي مالك في اي؟
شيلت ايديا ومكنتش مسخ ولا حاجة.. كانت سارة
اومال مين اللي انا شوفتها دي.. انا مش مجنون مش مجنون
نمت في اليوم ده وانا مش فاهم حاجة.. وشوفت حلم غريب.. حلمت أني ماشي في ارض بور صخرية معرفش انا فين ولا بعمل اي هنا؟
لحد ما ظهر قدامي.. كائن طويل رجليه اشبه برجول الجمل وايديه فيها 3 صوابع ووشه كان متقشر وباين اللحم.. منظره بشع وكان في ايده كوبايه فيها سائل احمر.. اشبه بالدم وفضل يحاول يشربني منه لحد ما فعلت شربت
وصحيت من النوم الاوضة غرقانة في الضلمة.. وسارة نايمة جمبي.. لكن باب الاوضة مفتوح وانا متأكد اني قافل الباب ده بايدي
وقدام الباب في حد واقف.. واحدة
قومت وانا بقول.. مين؟ مين اللي بره؟
قومت ولقيت شمعة بتتنور في وشي.. وفي اللحظة دي سامع صوت سارة من ورايا بتقولي واقف كده ليه؟
المشكله مش في أنا سارة بتندهلي… المشكله في ان اللي قدام الباب تبقي.. تبقي…. يتبع الجزء التاني
قائمة الانتظار
(مارد العشق)
الجزء الثاني
انا واقف مذهول.. اللي ورايا مراتي وبتنده عليا.. واللي قدامي برضو مراتي
أنا واقف متنح حرفيا مش فاهم ده اي؟!!
لكن اللي قدامي ابتسمت بخبث وبدأ وشها يحصل فيه حاجة غريبة وبشعة.. الجلد كان بيقع من وشها وبيظهر من تحته وش المسخ الدميم من تاني
رجعت لورا وانا بستعيذ بالله من الشيطان الرجيم
مراتي سألتني مالك يا وائل في اي؟
قولتلها
_ هو انتي مشوفتيش حد واقف قدامي دلوقتي؟
_ حد.. حد مين هو في غيرنا في الشقة وبعدين انت كنت واقف لوحدك عند باب الاوضة
هو في اي انت تعبان يا حبيبي؟
_ لا انا كويس.. كويس مفيش حاجة
..
عدت الليلة دي.. والصبح قومت من النوم لقيت سارة مجهزالي الفطار
ولقيت اهلنا جايين عندنا عشان الصباحية جايين يباركولنا.
أمي اول ما دخلت البيت.. وقفت وفضلت تستغفر ربنا وقلتلي
_ بيتك مش مريح يبني.. انا اتقبضت لما دخلت المكان ده
_ انا كمان يا أمي مش مرتاح وحاسس ان في حاجة غلط
..
في اللحظة دي سمعت.. سمعت صرخة كان صوت مراتي جاي من المطبخ
جرينا كلنا علي المطبخ وشوفت منظر هوصفه بالظبط
مراتي واقعة في المطبخ بوقها معووج ومنظرها صعب جداً.. ايديها ورجليا ملويين بشكل صعب
ابويا اتكلم وقال
اعوذ بالله من الشيطان الرجيم.. اعوذ بالله من همزات الشياطين واعوذ بك ربي ان يحضرون.
مراتي كان بيخرج منها صوت صراخ بشع مش صراخ عادي.. وبدأ جسمها يتنفض واغمي عليها
نقلتها للسرير واستردت وعيها ومكنتش فاكرة اي حاجة من اللي حصل وانا محبتش افكرها.. وطلبت من اهلي واهلها محدش يقولها حاجة
وقررت بيني وبين نفسي اني هجيب شيخ يقري في الشقه.. نزلت من البيت أدور علي شيخ
وفعلا لقيت شيخ محترم اسمه ناصر وجبته قري في البيت بعض الآيات من القرآن الكريم وطلب مننا نمسح البيت بمية وملح ونواظب علي الصلاة
…
اقدر اقولكم ان الموضوع بدأ يهدي بشكل تدريجي.. لحد ما مراتي جات
وقلتلي مبروك يا حبيبي أنا حامل
كنت اسعد واحد في الدنيا بالخبر ده ومش قادر اصدق
بس مكنتش عارف ان دي بداية المعاناة
..
بعد اليوم ده واحد من موظفين الشركة عمل حادثة ومات.. كان خبر صادم عشان كان فرحه بعد يومين
كلنا روحنا عشان نطلع الجنازة وندفنه في المقابر بدون الدخول في تفاصيل.. بعد ما ندفناه
والناس بدأت تتحرك.. سمعت صوت بينادي عليا بأسمي
اتلفت حواليا عشان اشوف مين اللي بينادي عليا؟
مشوفتش حد.. لكن في اللحظة انا حسيت بحاجة اخترقت جسمي.. كهربا ضربت جسمي كله
ووقعت علي الارض
وحسيت اني روحت دنيا تانية.. وشوفت نفسي واقف قدام الشقة وبفتح الباب ودخلت الاوضة عشان اشوف مراتي في وضع مش كويس مع واحد
منظر عمري ما اتخيلته
ولقيت نفسي بقوم وانا لسه واقع في المقابر.. قومت وانا بجري وبهرول زي المجنون وفي صوت بيخترق عقلي وبيقولي ده مش وهم سارة بتخونك يا وائل.. حطيت ايديا علي وداني مش عايز اسمع ده مستحيل يكون حقيقة
..
رجعت البيت عرقان وحالتي صعبة.. دخلت لقيت مراتي نايمة، قولت هاخد دش وادخل انام من غير ما تحس
لكن سمعتها بتقول وهي نايمة
انا مكنتش عوزاك.. مكنتش عوزاك اتجوزتني ليه؟
مكنتش عارف اصحيها واسألها عن اللي بتقوله ده لكن انا سبتها ودخلت اخدت دش ونمت
…
الأيام اللي بعد كده
كانت صعبة جداً عليا.. الفكرة اللي مسيطرة عليا هي ان مراتي بتخوني بقيت براقب تحركتها بتعمل اي.. حالتي ساءت
الكل لاحظ عليا البؤس والقلق وكنت بنكر كل حاجة
وللاسف المواقف كانت بتزود شكي
كنت في يوم راجع البيت وسمعت مراتي بتتكلم في التليفون وبتقول انها مش طيقاني وبتفكر تطلب الطلاق
ويمكن اللي مخلنيش انفجرت فيها ان بعدها بدقيقة جالها الطلق وصرخت واتنقلت المستشفى وخلفت بنتنا رانيا
3 سنين بعد عايش نفس المعاناة.. بطلت اصلي كل نومي بقي كوابيس.. حالتي النفسية ساءت
…
وفي يوم لقيت والدي جاي البيت ومعاه شيخ وبدأ يقرأ عليا آيات من القرآن الكريم والرقية الشرعية
مكنتش بعمل حاجة غير اني ببكي بس مكنتش بصرخ
والشيخ اتكلم وقال..
_ انت مسلط عليك.. مارد عشق عشان يشكك في مراتك واللي عمل فيك كده حد بيكرهك
انا خرجته بس هو هيرجع تاني.. اياك النهارده تخرج من البيت انا حصنتك لكن لو خرجت ممكن يرجع تاني والمرة دي هيرجع بانتقام
…
لكن انا مسمعتش كلام الشيخ.. وتفكيري كله راح لهدي واهلها.. وقررت اني لازم هروحلهم وانتقم منهم
مراتي حاولت تمنعني بكل الطرق.. لكني خرجت وروحت بيتها وفضلت اخبط وارزع على الباب لكن بواب العمارة قلي ان محدش منهم موجود وانهم سابوا المكان.. ومشيت
..
وانا راجع البيت لقيت راجل كبير في السن واقع علي الارض.. جريت عليه وقومته وانا بسأله مالك في اي يا حج؟
لكن عينيه اسودت وفتح بوقه وصرخ صرخة رهيبة ومعاها حسيت ان عضم جسمي بيتكسر وقعت علي الارض وانا هموت من الألم
وغبت عن الوعي.. لما فوقت كان الفجر علي آذان مكنتش انا اللي بمشي مكنتش انا المتحكم في جسمي.. روحت علي البيت وانا مش حاسس بنفسي
..
عارفين انا فوقت على اي.. انا فوقت على حاجة صعبة.. فوقت علي الشقة بتولع بمراتي وبنتي ومعاهم واحد انا معرفوش
حاولت اتصرف وانقذهم… لكن للاسف الوقت كان فات وانا هربت.. هربت ومش عارف اني رايح فين انا قتلت مراتي وبنتي
غمضت عينيا عشان اشوف المشهد اللي انا عملته وانا مش حاسس.. شوفت نفسي داخل الشقة وبدلق بنزين في كل مكان.. مراتي بتصرخ فيا وانا مش سامعها.. وولعت في الشقة ولقيت واحد معرفوش داخل الشقة وبيقولي انقذ الناس انقذ الست وبنتها لقيت نفسي بمسكه وبرميه في النار.. وفتحت عينيا لكن اتصدمت من اللي شوفته.. شوفت.. يتبع الجزء الثالث
…
قائمة الانتظار
(مارد العشق)
الجزء الثالث والاخير
شوفت قدامي كائن اصلع اسود سواد حالك.. عينيه بيضة.. شكله مفزع واقف قدامي ومبتسم
صرخت وقولتله.. انت اي انت اي؟
صرخ في وشي
جريت فضلت اجري اجري وانا مش عارف انا رايح فين؟
لقيت نفسي واقف في منطقة غريبة اول مرة اشوفها.. كانت كلها بيوت صغيرة وكنت سامع صوت ناس بتتكلم
قربت من مصدر الصوت.. لقيت ناس كتير قاعدة علي الأرض وواحد قاعد قصادهم وبيقول
_ المركب هتوصل الساعة 4 الفجر.. يعنى كمان شوية عاوزكم تكونوا جاهزين
..
عرفت ان الناس دي هتسافر بطريقة غير شرعية.. قولت انا هراقبهم وهركب معاهم المركب
معرفش جبت الفكرة دي منين؟!
وفعلا اتحركت وراهم ووصلت للمركب وركبت
محدش اعترضني ولا قلي انت مين ولا انا عندي فكرة المركب دي رايحه فين؟
…
بدون الدخول في تفاصيل مش مهمة.. قعدنا في البحر 3 ايام لحد لما جات اللحظة اللى قربنا فيها من بلد.. ومن سؤالي عرفت انها بلد عربية لكن مش هذكر اسمها
والناس بدأت تنط في المية وانا كمان نطيت محستش بنفسي غير وواحد بيفوقني وكانت لهجته عربية.. وقلي انه خاف الاول لما شافني وبعد كده قرر يساعدني.. وعرفت ان اسمه نصار
روحت معاه بيته.. وبصراحة الراجل عمل اللي عليه وزيادة
لكن انا اكتشفت ان الراجل ده مخاوي للجن وده باين من كتب السحر اللي في اوضته
..
لكن فجاة لقيته دخل الأوضة وهو بيقولي
_ مفيش حاجه بتحصل في الزمن ده بتكون صدفة حتي مقابلتي ليك مكنتش صدفة
انت الجن اختارك عشان يرجعلك حقك.. اختارك عشان هيقف جنبك ويساعدك عشان هو بيكره عشيرة المارد اللي دمر حياتك
_ انا مش قادر اصدق
_ لا صدق انت هتكون قوي اشارة منك تقوم حرب
…
ومن هنا بدأت حياتي تتغير 150.. بدأت اتعلم كل حاجة حرفيا
شوفت مع الراجل ده ازاي تأذي بني آدم ويعني اي آذية اصلا.. لحد ما حصلت حاجة
أنا قررت ارجع مصر لكن المشكلة دلوقتي انا في حكم الميتين دلوقتي.. لكن بعد مرور خمس سنين لقيت الراجل بيقولي اني اقدر ارجع مصر.. ارجع عشان انتقم من كل واحد آذاني واتسبب في موت عيلتي
..
بس مكنتش عارف ان الصدف ممكن تلعب دورها معايا بالشكل ده… انا رجعت مصر طيارة وطبعا مفيش حاجة توقف نصار.. اللي بكل سهولة جبلي تأشيرة وباسبور وقلي
_ نزولك ده بغرض الانتقام.. انتقامك من اللي آذوك وانتقامك من عشيرة المارد اللي دمر حياتك
رجعت عشان الانتقام منهم هيبدأ دلوقتي.. لكن لما وصلت المطار ووصلت عند الشباك تحديدا.. اتفاجئت بحاجة كانت لا يمكن تاجي علي بالك
اللي واقف علي الشباك ده اخويا حسن اللي واقف بصصلي وهو مبرق
يعني سوء الحظ بيلعب معايا لعبته وعاوز يوقفني وده لا يمكن يحصل أبداً
..
حسن اتكلم وقال
_ وائل لا لا مش ممكن.. وائل مات وانا دفنته بايدي
_ في اي يا استاذ.. هو انتي تعرفني وبعدين ميت ازاي؟ انت بتموتني وانا لسه عايش علي وش الدنيا
_ انت هتستعبط انت وائل.. يعني التشابه في الاسم والشكل كمان
في الوقت ده ادخل موظفين المطار علشان يدخلوا في المشكله دي واعتذرولي وقلولي انه اعصابي تعبانه وسامحه
كان نفسي اخده في حضني واقوله وحشتني يا اخويا نفسي اسأله عن ابويا وامي
لكن للأسف ده مينفعش.. محدش هيعرف اني لسه عايش
خرجت من المطار.. على بيت في منطقة معزولة جنبه مفيش غير تلات او اربع بيوت
واللي عرفته ان هدي وعيالتها ساكنين في العمارة اللي قصادنا
…
بدأت اول خطوة في الانتقام وهو ابن عمها او قريبها اللي كان ليه علاقة بالسحر
جبت واحدة بمساعدة الجن وسخرت عليها ملك من ملوك الجن السفلية وطلبت منها انها تروح للشيخ اللى هيقدر يعالجها
وفعلا رحتله كان اسمه مراد.. وطبعا حاول يعالجها لكن الجن ده موكل بالموت.. وبعد انتهاء الجلسة لقيوا جثة مراد في بيته وعلي وشه اشد انواع الفزع وده كان انتقامي من الضحية الاولي
..
موقفتش عشان اخلي الضحية التانية والتالتة يموتوا بعض.. والد ووالدة هدي.. القشاية اللي هتكسر ضهرها للابد
سلطت جن من اقوي انواع الجن.. اسمه طارش وده من صفاته انه بيخلي الشخص يفقد عقله حرفيا وسلطته على ابوها
اللي بعد اسبوع واحد الناس اللي في المنطقة صحيوا علي منظر شنيع.. الراجل رمي مراته من البلكونة وانتحر بعدها
محدش كان فاهم اي اللي بيحصل للعيلة دي بالظبط
وطبعا هدي كانت حالتها في النازل
..
وجيه الدور علي الضحية الرابعة عم هدي.. وده كان انتقامي منه بسيط جداً ويمكن ده اللي انا مسخرتش جن ولا حاجة.. هو الجن الموجود في خدمتي من نصار اتسبب ليه في حادثة عربية مات فيها قضاء وقدر
..
كنت عايز اخلي هدي لوحدها بس قبل ما اخليها وحدها سلطت عليها جن موكل بالموت البطئ اسمه ظام
وده انتقامه بيكون صعب جداً
وروحت عشان اكمل باقي حقي.. عشان اخد حقي من باقي العيلة ام الساحر الدجال مراد اللي دمر حياتي
عملت ليها سحر الجنون.. واللي ميعرفش سحر الجنون ده سحر بيخلي الشخص المسحور يشوف حاجات مش موجودة ومبيكنش حاسس بالي بيعمله
انا خليت ام الدجال ده تولع في نفسها النار تعيش احساس مراتي وبنتي وهما بيتحرقوا قدام عينيا
..
وجيه الدور علي الضحية السادسة.. تؤام هدي واللي موته هيخلي هدي لوحدها تماما.. وده كان رافض اللي اهله بيعملوه
واستغله الجن وخلاه يحرق كل حاجة تخص عهد مارد الجن.. تعرفوا المارد عمل في اي؟
المارد حرقوه في لحظة ومش حريق عادي.. ده جسمه اتفحم تماما
…
وجيه الدور اخيرا علي هدي.. اللي كانت قاعدة في شقة لوحدها قررت اروحلها بنفسي
وروحتلها.. هدي البنت الجميلة اتحولت لبنت هزيلة جدا تحت عينيها هالات من السواد
كانت صلعة معندهاش شعر في راسها نهائي
اول ما شافتني جريت عليا وكانت بتقع وتقوم وهي بتبكي وبتقولي.. كلهم ماتوا.. ماتوا يا وائل ماتوا
طلعت من جيبي سكينة وببرود اعصاب دبحتها ايوة بالظبط دبحتها
…
خرجت من الشقة ومن العمارة كلها وسجلت في مذكراتي كل حاجة حصلت واتقبض عليا مقومتش بالعكس انا اعترفت بكل حاجه عملتها وراضي بالحكم اللي انا عارفوا كويس.. سامحني وخلي بالك من نفسك ومن ابوك وامك يا حسن
…
قفلت المذكرات والدموع في عينيا وقولت من قتل يقتل ولو بعد حين.
…
تمت.
